2022ko Merezimenduzko Argia Saria: Gure Irratia, Irulegiko Irratia eta Xiberoko Botza
Izan duten ibilbide aitzindaria omentzeko, Gure Irratia, Irulegiko Irratia eta Xiberoko Botza irratientzat da aurtengo Merezimenduzko Argia Saria. 40 urtetik gora daramate Euskal Herriari eta euskaraz emititzen, ezinbesteko ekarpena eginez.
1981ean hasi ziren emititzen Gure Irratia Milafrangatik eta Irulegiko Irratia berriz Irulegitik. Hortik hilabete batzuetara, 1982ko udan, Xiberoko Botza ere agertu zen Ipar Euskal Herriko irrati-paisaian. Antena bat tontor baten gainean kokatu, FM irrati-igorle bat eskuratu, bolondres baten etxean mikrofono pare bat entxufatu eta abiatu ziren, ahal bezala, uhinen bidez euskara zabaltzeko abenturan. Euskara eta hurbiltasuna: bertatik bertara euskaraz. Hori zuten erronka.
Ments edota ameslaritzat hartuko zituzten batek baino gehiagok, are gehiago euskaltzaleak usu begi txarrez begiratuak ziren garai hartan. Eskerrak ametsari lotu eta honen gauzatzeko ausardia ukan zutela.
40 urte pasa dira. Urratsez-urrats, bide egin dute. Handitu eta profesionalizatu dira, betiere entzuleekiko hurbiltasuna bermatuz. Euskaldun ororen sukalde txokoan entzungai dira, eta lagun fidela ere dira anitzentzat. 1997an elkartu eta Euskal Irratiak federazioa osatu zuten, berantago sortuko zen Antxeta Irratia ere sarean sartuz.
Bolondresak zituzten oinarrian eta 40 urte berantago hor segitzen dute oraindik, esku-ukaldi bat emateko prest, guzien artean biziaraziz irratia. Laburbilduz: herrigintzaren ekarpen balios eta behar-beharrezkoak ditugu Gure Irratia, Irulegiko Irratia eta Xiberoko Botza, 1980. hamarkadan bezala gaur egun ere.
Duela 40 urte ukandako ausardia eta orduz geroztik Euskal Herriari, euskarari eta euskaraz bizi nahi dugun herritarroi egindako ekarpena saritu nahi dugu merezimenduzko sari honen bidez.
Esker ona adierazi nahi diegu 2022. urteko argia sariak babestu dituzten eragileei:
- Arabako Foru Aldundia
- Bizkaiko Foru Aldundia
- Emakunde
- Eusko Jaurlaritza, Kultura eta Hizkuntza Politika Saila
- Gipuzkoako Foru Aldundia
- Kutxabank
- Laboral Kutxa
- Mondragon Korporazioa
- Nafarroako Gobernua, Euskarabidea
Globalera ohitu gaituzte. Zirraragarria da munduko edozein txokotako informaziora iritsi ahal izateko gaur egungo aukera. Zoratzerainokoa, hainbeste leiho ireki zaizkigunean. Klik bakar batean. Baina munstro handi bat ere bada, irensten gaituena bere seduzitzeko gaitasunarekin... [+]
Streaming plataformetan euskarak duen presentzia urriari aurre egiteko martxan jarritako Pantailak Euskaraz ekimenari eman diogu aurtengo kanpaina onenaren Argia Saria, denbora gutxian herritarren nahiari ahotsa eman eta ardura dutenak mugiaraztea lortu dutelako.
Ulu Mediak eta EITBpodkastek ekoitzitako Artxipelagoa fikzio podcast seriearentzat da aurtengo irrati ataleko Argia Saria. Ulu Mediako kideek jaso dute saria.
Badok.eus atariarentzat da aurtengo Interneteko Argia Saria, Internetek gure bizitzetan duen gero eta presentzia duen garian euskal musikarentzat eta haren zaleentzat ezinbesteko itsasargi izateagatik. Jon Eskisabelek jaso du saria.
Aiaraldea hedabidearentzat da prentsa ataleko aurtengo Argia Saria, Laudioko eta Amurrioko Tubacex-eko langileen greba, erresistentzia eta bizipenak hurretik kontatzeagatik. Bertako kazetariek jaso dute saria.
Azpeitiko Kulturaz Kooperatibaren ekimeneko DAPA ikus-entzunezko narrazioak dira aurtengo ikus-entzunezko Argia Sariaren irabazlea. Kulturaz Kooperatibako kideek jaso dute saria.
Badatoz urteko euskarazko komunikazioko lanik txukunenak saritu asmo dituzten Argia Sariak. Aurten ere sarean emango dugu haien berri, urtarrilaren 31tik otsailaren 5era, egunero 10:00etan webgune honetan bertan.
Oraindik hilabeteak falta dira Argia Sarietarako, urtarrilaren amaieran izaten baitira, baina hauen prestaketarako makineria abian da jada. Prozesuaren kate-begi garrantzitsuenetakoa da hautagaien bilketarena.
Atzo esan dit lagun batek: “Iraila joan zaigu, berehala ordu aldaketa, eta horrekin batera jada Gabonetan sartzen gara”. Ez ditut denbora salto azkarregi horiek atsegin. Etzikoan ere pixka bat pentsatzen duten horietakoa naiz, baina unean unekoa eta tokian tokikoa... [+]