Komunitatea hats-bahiturik
Ainize Madariaga Muthular
UEU, 2018/ 130 or.

Hiztun traumatizatuaren historia kontatu du egileak. Psikoterapeutak, 44 urteko zuberotarraren korapiloa askatu ezinik, ondokoa galdetuko dio: “Zer gertatu zitzaizun 5 urte zenituela?”. Pazienteak esan dio eskolan eta etxean euskaraz egitea debekatu ziotela adin horretan. Onintza Irureta Azkune

* * * * * * * * * *

Mihia aske

Elias Canetti
(itzul. Ibon Uribarri)
Erein-Igela, 2013 / 423 or.

Bulgariako familia judu sefardi batean jaio eta alemanez idazten zuen Elias Canettik: hara hor identitatearen konplexutasuna ulertzeko abiapuntu bat. Mihia aske bere autobiografiaren lehen zatia da. 1977ko obra honen arrakastari esker lortu zuen Nobel saria, hein handi batean. Gorka Bereziartua Mitxelena

* * * * * * * * * *

Den-dena nahi dugu

Nanni Balestrini
(itzul. Fernando Rey)
Katakrak, 2019 / 206 or.

Italia Hegoalde txirotik iparralde industrializatura joan eta Fiat autogintza fabrika erraldoian amaituko du lanean protagonistak. Hasieratik problematikoa, sistema krisian sartzera helduko dira langileak. 60ko hamarkadako Italiako langile mugimendu  autonomoaren kontakizun ederra da lan hau. Lander Arbelaitz Mitxelena

* * * * * * * * * *

Hondarrak
Ruben Sánchez Bakaikoa
Txalaparta, 2019 / 360 or.

1936ko gerra, gerra ostea, demokrazia garaiko gerra. Pilar eta Julia, Tupa, Gasteiz eta Uxue herria. Garaileak eta garaituak, herrien heriotz geldoa, “aske” direnak eta espetxeratuak, kartzela. Horren guztiaren hondarren kontakizun arin, mamitsu, zintzo eta umoretsua. Zigor Oleaga

* * * * * * * * * *

Joana Maiz
Joseba Larratxe
Yurre Ugarte
Harriet, 2019 / 112 or.

Joana Maiz eta Lauren. Bi emakume, haien desioengatik borrokan. Euskal nortasunaz komiki ez kanonikoa. Bilbo. Abiadura Handiko Trena. Autobideak baserria nola, orain trenbideak bota nahi du bizitoki bihurturiko borda. Hienak, kaioak, arranoak, astoak. Animalia jendea. Erresistentzia. Jon Torner Zabala

* * * * * * * * * *

Capitalismo y democracia
(1756-1848)
Cómo empezó
este engaño

Josep Fontana
Critica, 2019 / 200 or.

Kapitalismoa nola sortu zen modu desberdinean azaltzen digu Fontana zenak, erakutsiz orduko igualitarismoa non zegoen eta egungoaren klabeetan arakatzen. Burgesiak legedia bere mesederako nola lotu ohi duen ere argi azaltzen du. Xabier Letona Biteri

* * * * * * * * * *

Pedagogías Queer

Mercedes Sánchez Sáinz
Catarata, 2019 / 160 or.

Normaltasuna gehiengoa bezala izatea bada, inor ez da normala, bakoitza delako ez-estandarra ezaugarriren batean. Nola egin guztiontzako eroso izango den eskola, “berezi”-entzat petatxoak jarri beharrean? Umore handiz kritika zorrotza egiten dio eskolari eta praktika zehatzak proposatzen ditu, esperientziatik. Estitxu Eizagirre Kerejeta

* * * * * * * * * *

Fables amères. Détails futiles

Chabouté
Vents d´Ouest, 2019 / 102 or.

Eguneroko ttipikeria ustez hutsalak, baina gure jendarteko injustizien eta norbanakoon kontraesanen erakusleiho handi direnak. Hitz guttirekin eta marrazki ezin ederragoekin dator berriz ere komikigilea, 2010eko Fables amères. De tout petits riens obrari segida emanez. Jenofa Berhokoirigoin

* * * * * * * * * *

Patioa denona da

Tipi Eraldaketarako Diseinua
Tipi, 2017 / 82 or.

Hainbat ikastetxetako jolastokiak birpentsatu eta eraldatzeko prozesuan laguntzaile aritu da Tipi, eta liburuxka honetan jaso du bidean ikasitakoa, sortutako zalantzak, espazioaren garrantzia, patioetako dinamikak... Prozesua abiatu nahi duen edozein hezkuntza gunerentzat baliagarria. Mikel Garcia Idiakez

* * * * * * * * * *

Solitude

Jon Lekue Goikuria
Txertoa, 2020 / 340 or.

AEBetara XX. mende hasieran emigratu zuten bi euskaldunen historia kontatzen du eleberriak. Sorterrira aberastuta itzuli ziren indiano arketipoetatik urrun, hara joan ziren gehienei eremu bakarti eta gogorrean bizirautea egokitu zitzaien. Heriotza, bizitza modernoa eta pertsonaia ezagunak uztartzen dituen kronika. Urko Apaolaza Avila

* * * * * * * * * *

Gizon zuzenak
Albert Camus
Egan, 2017 / 71 or.

Camusek 1949an idatzi (Les justes), 1966an Xalbador Garmendiak euskaratu, 1967an Jarrai taldeak eman. Abertzaleak borroka armatuaren korapilo etiko eta estrategikoez hausnarrean... 67an? Antzerki unibertsal bat euskara batuan… batua sortu aurretik? Euskaldunak baziren norbait 1960ko hamarkada hartan. Pello Zubiria Kamino

* * * * * * * * * *

Hitz beste
(2003-2017)

Anjel Lertxundi
Berria, 2017 / 223 or.

Euskal kazetaritzaren historian leku oparoa utzi duen idazle oriotarrak Berria-n 14 urtez  egunero idatzitako ia 4.000 zutabe laburrekin berriro gozatzeko lana. Lertxundik berak egindako aukeraketa 15 ilustraziogileren lanekin apaindua. Axier Lopez

* * * * * * * * * *

Hoy es el último día del resto de tu vida
Ulli Lust
La Cupula, 2011 / 464 or.

1984ko udan, 17 urteko bi gazte punkik Italiara ihes egitea erabakiko dute lo zakua eta soinean daramatena soilik hartuta. Bidaia autobiografiko honetan, drogez, sexuaz, matxismoaz, mafiaz eta askatasunaren balioaz ausart eta umoretik mintzatuko da Ulli Lust komikigilea. Jatorrizkoaren izenburua: 'Heute ist der letzte Tag vom Rest deines Lebens'. Maitane Gartziandia

* * * * * * * * * *

Por qué las mujeres disfrutan más del sexo bajo el socialismo

Kristen Ghodsee
Capitán Swing , 2019 / 220 or.

Ghodseek ikertu du nola kapitalismoak ez bezala, ondo garatutako sozialismoak independentzia ekonomikoa dakarren emakumeentzat, lan baldintza hobeak, kontziliazio egiazkoagoa, eta sexu hobea. Jatorrizkoaren izenburua: 'Why Women Have Better Sex Under Socialism'. Onintza Irureta Azkune

* * * * * * * * * *

L’Agnese va a morire
Renata Viganò
Einaudi, 1949 / 256 or.

Agnese izeneko emakume helduaren eskutik, II. Mundu Gerrako Italian murgildu eta Erresistentzia italiarra bertatik bertara bizitzea ahalbidetuko dion pasea aurkituko du irakurleak orriotan. Partisano gisa bizi izandakoak eta kide izandako emakume baten historia oinarri hartuta, Renata Viganòk 1949an idatzitako eleberri ederra. Amaia Lekunberri Ansola

* * * * * * * * * *

GB84
David Peace
Faber & Faber, 2004 / 465 or.

Ikatz meatzeen itxiera iragarri du Margaret Thatcherren gobernuak eta Erresuma Batuko grebarik handiena eragin du. Piketeak, poliziak, eskirolak, bultzakadak, kolpeak, gerra zikina eta klase borroka gordina. Milaka langileren bizitza markatuta utzi zuen urtea thriller bilakatu du autoreak. Liburu gogorra, meatzariei omenaldia. Lander Arbelaitz Mitxelena

* * * * * * * * * *

Liburu gomendio hauek  ARGIAren Aktualitatearen Gakoak aldizkarian argitaratu dira. Paperean irakurri nahi badituzu, Azokan eros dezakezu.