Jose Antonio Agirre lehendakariaren gorpua Euskal Herrira ekarri zuten. Donibane Lohizuneko elizan egin zioten hileta eta beila Telesforo Monzon eta Maria Josefa Ganuzaren etxean egin zuten. Jendetza pasa zen bertatik.
Hego Euskal Herrian ere hainbat izan ziren egun hartan lehendakari erbesteratuaren omenez egindako hileta elizkizunak. Donostian 8.000 lagun bildu ziren poliziaren begiradapean, eta Sestaon, elizkizunera joan ziren batzuk Cara al Sol abestera behartu zituzten Francoren guardiek. Donostiako Urgull mendian ikurrina paratu zuten xingola beltzarekin.