Iparretarrak-ek lehen “gau urdina” antolatu zuen, hainbat atentaturekin. Txomin Olhagarai eta Ramuntxo Arruizen heriotzen urteurrenean, kalte material handiak eragin zituzten. Atentatuak, ohi bezala, higiezinen espekulazio eta desertizazio kultural eta ekonomikoaren ikurren aurkakoak ziren: Baionan hezkuntza ikuskaritza bulegoari eta Merkataritza Ganberako patronalaren bulegoari egin zioten eraso, Aiziritzen opor zentro bati eta Ziburun kirol kaiari. Biharamunean, eraikuntza sustatzaile baten bulegoen atarian zartatu gabeko beste bi leherkari aurkitu zituzten. Urtebeteko etenaren ondoren, fase aktiboago eta erradikalago batean sartu zen Ipar Euskal Herriko erakunde armatua.