60.000 soldaduk Mendigorrian Lehen Karlistaldiko gudurik handiena borrokatu zuten. Zumalakarregi hil eta Bilboko lehen setioaren ostean, Nafarroa bilakatu zen gudu-zelai nagusi berriro ere. Mendigorrian 24.000 soldadu karlista zeuden, Karlos erregegaiaren armada osoa, 36.000 soldadu liberalek erasoa jo zutenean. Gogor eutsi arren, karlistek atzera egin behar izan zuten. Liberalek, ordea, porrot gisa hartu zuten emaitza, ez baitzuten armada karlista txikitzea lortu, eta gudu-zelaian zen Karlosek ihes egitea lortu zuen. Soldadu karlisten artean zen Jose Maria Iparragirre gaztea, 14-15 urterekin.