Soziolinguistika Klusterrak eta Mondragon Unibertsitateak bukatutzat eman dute Eralan2 ikerketa proiektua eta ondorioak azaroaren 17an agertu zituzten jendaurrean. Euskara normalizatzeko planak dauden erakunde publikoetan eta enpresetan, lidergoaren aldagaiak nola jokatzen duen aztertzen du proiektuak. Zazpi esperientzia pilotu egin dituzte: Bermeoko Udala, Fagor Ederlan, Gipuzkoako Foru Aldundia, Berrizko Udala, Donostia Gipuzkoa Kutxa, JEZ Sistemas Ferroviarios eta Mungialdeko Gizarte Zerbitzuen Patzuergoa.

Lidergoa, kirolean, politikan edo feminismoan ez bezala, hizkuntzarekin lotuta oso gutxi landu den aldagaia da. Bi urteko iraupena izan du proiektuak eta zazpi interbentzioak lagin txiki bat baino ez dira. Nekane Goikoetxea proiektuaren zuzendariak garbi adierazi zuen euskararen normalizazioan lidergoa lantzea ez dela panazea izango eta ez dagoela mapa borobilik.

Lidergoaren inguruko teorizazioa konplexua da, ezezaguna neurri handi batean, eta zazpi interbentzioetan parte hartu duen batek baino gehiagok aitortu zuen gaian kokatzea ez zitzaiela batere erraza egin. Eralan2 bada ere (Eralan1 aurrekaria baitu), hizkuntza/lidergoa binomioa abiatu baino ez dela egin esan daiteke.

Huheziko Fakultatean, Nekane Goikoetxeak egindako sarrera argigarriak eta zazpi “akurien” azalpenek lagundu ziguten gai ezezaguna pixka bat ulertzen. Alabaina, ondorengo mahai-ingurua izan zen adierazgarriena. Han zeuden eserita Bermeoko Udaleko kontu hartzaile Edurne Urrutia, Fagor Ederlan Koop. E.-ko lehendakari Mikel Uribetxebarria, Kutxako Gizarte Ekintzarako zuzendari Carlos Ruiz eta Gipuzkoako Foru Aldundiaren izenean Maria Jesus Aranburu Kultura eta Euskara diputatua eta Estibaliz Alkorta Euskara zuzendaria. Bostak dira lider euren enpresa edo erakundeetan eta Eralan2 proiektuan parte hartu dute. Oso interesgarria izan zen haien esperientziak entzutea: nola bizi duten euskara lantokian, lankideekin nola garatzen duten harremana euskara tartean dela, norbera eredu izatea nola bizi duten...