ARGIAko erredakzioaren eskutik, sei irakurgai proposamen.
Transgresioa irakasgai. Hezkuntza askatasunaren praktika gisa
Bell Hooks
Itzulpena: Amaia Apaulaza Ollo
Katakrak, 2023
214 orrialde
Bai ikasle gisa beltzentzako eskola batean bizi izan zituenak, bai gero irakasle zela praktikara eraman zituen pedagogia askatzaileak eta horren bueltako erresistentzia, beldur, hutsegite eta fruituak bildu zituen Bell Hooks idazle, irakasle eta militante feministak iaz euskaratutako liburu honetan. Hezkuntza ardatz hartuta, ikasgelako dinamiketan klase, arraza eta generoa deskolonizatu beharraz, ahots eta gorputz baztertuez edota hezkuntzaren indar iraultzaileaz sakon eta argi dihardu saiakera honetan. Mikel Garcia Idiakez
* * * * * * * * * *
Lurraz beste
Garazi Arrula
Txalaparta, 2023
200 orrialde
Laudorio ugari entzun edo irakurri dut Garazi Arrularen bigarren ipuin liburuaz: gure garai kapitalista aldakor honek sortzen dizkigun noraezak, kontraesanak zein heldulekuak bikain jasotzen dituela bere pertsonaietan, erregistroen aberastasuna ipuinez ipuin, testua ironia maltzurrez zipriztintzeko duen gaitasuna, amaiera irekiak... Arrazoi askoz ere sinpleagoa –baina batere garrantzi gutxiagokoa– dago, ordea, Lurraz beste irakurtzeko: goi-mailako idazkeran murgildu, korronteak eraman zaitzan utzi, eta irakurtze hutsaren plazeraz gozatzea. Zigor Olabarria Oleaga
* * * * * * * * * *
Ekonomia eraldatzaileak
Oscar García Jurado eta Olatukoopeko hainbat kide
Olatukoop, 2024
92 orrialde
Liburu bat baino, eskuartean ibiltzeko eta amesteko manuala da honakoa. Edo “pitzadurak irekitzeko mailu bat”, sarreran dioen gisan. Lanean eta herrigintzan erabili ohi ditugun hainbat kontzeptu ekonomiko berraztertzen ditu: ekonomia kapitalista, soziala, komuna, feminista... Zer den bakoitza, eta zer ez den. Burujabetzatik eta autoeraketatik proposamenak ere egiten ditu, eraldaketa eta lurraldeak oinarri. Olatukoopek 10. urteurrena ospatzeko egin digun oparia, P2P lizentzia ez-kapitalistan eskuragai denontzat. Urko Apaolaza Avila
* * * * * * * * * *
Palestinaren okupazioaz eta kolonizazioaz
Perry Anderson
Itzulpena: Amaia Astobiza eta Iñigo Roque
Katakrak, 2024
172 orrialde
Ezagutu nahi baduzu Palestinako XX. mendeko historia, irakurri, adibidez, Palestina, cien años de colonialismo (Rasihd Khalidi). Eta Israel zer den ulertzeko, La Idea de Israel. Una historia de poder y conocimiento (Ilan Pappé). Biak ezinbesteko liburuak Israelek palestinarren aurka daraman genozidioa ulertzeko. Baina askoz laburrago, sakontasunez eta euskarazko bazka ederra nahi baduzu, Perry Andersonena bikaina da. New Left Review aldizkariko 2001eko eta 2015eko bi artikulu dira, eta zapalkuntza honen historia eta gaurkotasuna ulertzeko puntu giltzarriak eskaintzen ditu. Xabier Letona Biteri
* * * * * * * * * *
Herriak du gehien agintzen
Raquel Varela eta Robson Vilalba
Itzulpena: Eskarne Mujika Gallastegi
Txalaparta, 2024
175 orrialde
Portugalgo Krabelinen iraultzak 50 urte bete dituen honetan, Europako azken hamarkadetako iraultza sozialik sakonena ezagutzeko gonbidapena da komiki hau. Ez da, baina, historia liburu bat. Herria agintzera nola iritsi zen kontatzen da, ezkerreko mugimenduetan burubelarri ibili zen José protagonistaren bizipenen bidez –egiazko historia da–. Niretzat ezezagunena: hiru urteko herri-boterearen dimentsioa eta hori kamustea nola lortu zuen erreformismoak. Robson Vilalbaren zuri-beltzeko ilustrazioek oso modu berezian irudikatzen dute historia. Lander Arbelaitz Mitxelena
* * * * * * * * * *
Todo bajo el sol (Dena eguzkipean)
Ana Penyas
Salamandra Graphic, 2021
160 orrialde
Masa-turismoa, hirigintza-espekulazioa eta drama soziala. Penyasek geroz eta hiri gehiagoren arazo diren gentrifikazioa eta ekoizpen-eredua zalantzan jarriko ditu Levanteko kostak 1960. hamarkadan jasandako txikizioaren bidez. Hamarkadetan zehar, neoliberalismoaren gorakadak familia bateko kideen itxaropenak eta proiektuak nola eraldatuko dituen kontatzen du. Adreiluaren boom-agatik beren lekua utzi behar izan zutenei eskainitako kronika grafiko gordin bezain ederra. Maitane Gartziandia Agirrezabala
Muturreko lehorteak eta euriteak dira beroketa globalak Pakistanen duen inpaktuaren alde agerikoena. Ez dira hain ezagunak, ordea, hondamendiek piztu eta bizkortzen dituzten gaitz sozialak, eta zenbat eta nola oztopatzen duten azken horiek Asiako herrialdearen garapen oso eta... [+]
Aragoiko Asabón errekak zeharkatzen duen lurraldeak hainbat ustekabe eder gordetzen ditu. Ez naiz historialaria, eta, hortaz, ez dut halako kronika historiko bat eginen. Bereziki mendizale gisa mintzatuko naiz, aspaldi honetan nire gogoak –nire senak– halako... [+]
Herrialde berri batera moldatzeak dakarren astindu identitarioaz gain, migrazio-bidaietan eta berton aurre egin behar dieten indarkeriek oztopatzen dituzte etorkinen bizipenak. Psikoterapia da ondoeza sendatzeko bide bat, baina ez bakarra.
Hamasen erasoaren ezohiko muntak, eta Israelgo gerra-kabineteak hari emandako erantzunaren desmasiak zerikusi zuzena dute ondorio geopolitikoen sakonerarekin. Ekialde Ertainean eta nazioarteko aliantzetan aldaketak eragin ditu genozidioak: Israelek zer irabazi eta galdu du?... [+]
Zirrara eta pasioaren eroale da Arantxa Orbegozo Txitxi (Tolosa, 1962). Bizitza darama eskuetan eta hura eskaintzen dio zuzentzen zaion edonori. Atleta izan da, txirrindularia, eta bere buruari proposatu dizkion beste hainbat diziplinatan aritua. Hala eta guztiz ere, benetan... [+]
Aspaldidanik Saran bizi den arren, goiza Bidasoaren ibarrean pasa behar zuenez gero, Hondarribiko parte zaharrean zitatu gaitu Ruper Ordorikak (Oñati, 1958). Goiz eguzkitsuan, puntual eta irribarretsu agertu da maldan gora, konsistorioaren parera, turista gazte kuadrilla... [+]
ARGIAko erredakzioaren eskutik, sei ikus-entzunezko proposamen.
ARGIAko erredakzioak aurtengo zortzi hilabeteotan kaleratu diren diskoen artean hiru hautatu ditu, gomendatzeko.
Familiaz, azalpenak eman beharraz, topikoez, askatasunaz, kontziliazioaz, sareaz eta komunitateaz, erru sentimenduaz, ekonomiaz, traba legal eta administratiboez, haurraren eskubide urraketez... solastatu gara, hautuz gurasobakar diren Argider, Junkal, Koldo eta Maitanerekin... [+]
Odei Etxeberri Bimboire, Gorka Roca Torre eta beraien seme Oihan eta Miru buruaskiak dira elikaduran. Horretarako, aztertu behar izan dute gorputzak zer elikagai eta zein kopurutan behar dituen; horiek zein janaritan dauden; urtaro bakoitzean horiek denak eskuratzeko zer landu... [+]