Hala Bedi irratiak lehen emisioa egin zuen Gasteizko txosnagunetik. 1980ko hamarkadan mugimendu alternatibo oparoa loratu zen Gasteizen, eta herri mugimenduetako eragile ugariren ekimenez eratu zen irratia, ahotsik gabeko kolektibo zein norbanakoei ahotsa emateko. Abuztuaren 4an ziren lehen aldiz emititzekoak, Zeledonen jaitsieran, baina plazan ziren esatariak atxilotu egin zituzten. Bi egun geroago emititu zuten, eta azpiegitura eta edukiak finkatu arte etenaldia egin zuten ondoren. Hasieratik pairatu zuten poliziaren jazarpena, baita hainbat itxiera ere. Halere, ezin izan dituzte isilarazi.