Orreagako monasterioan lapurtu eta hura suntsitu zuten Gaztelaren aldeko soldaduek. Jaime Belza de Medrano kapitain nafarraren armadarengandik ihesi zihoazen soldadu espainiarrek eta beaumondarrek Orreagan hartua zuten babes. Nafarrek monasterioa setiatu zuten, baina espainiar errefortzuak iristear zirela, ihes egin behar izan zuten. Monasterioa uztean, gaztelarrek hain zaharra eta sinbolikoa zen abadia nafarra erabat suntsitu zuten barrutik. Nafarroa konkistatu zutenetik, gaztelarrek Nafarroako kleroa ere jo-mugan jarri zuten, eta beren erregimenaren aldekoak jarri zituzten ardura postuetan.