Lehen aldiz antolatu zuten Lilatoia Donostian, emakumeen lasterketa. Antolatzaileek Irlandan egiten zen emakumezkoen lasterketa batetik hartu zuten ideia eta Martxoaren 8aren inguruan egitea proposatu zuten, kale okupazioa eta emakumeen ikusgarritasuna helburu jarrita. Lehen urteetan zailtasun handiak izan zituzten, irainak eta mespretxuak jasan behar izan baitzituzten gizonezkoen aldetik. Urteekin indar handia hartu duen ekimena da, eta lehen urtean parte hartu zuten 130-150 korrikalarietatik, 6.000tik gora izatera heldu dira zenbait hamarkadatan.