Istripua izan zen Mayak zentral nuklearrean, Sobiet Batasunean –gaur egungo Errusian–. Plutonioa ekoizten zuten bertan arma nuklearrentzat, besteak beste. Hondakin erradioaktibo likidoa gordetzen zuen andel batek eztanda egin zuen, materia erradioaktiboz osatutako hodei bat hedatuz Kyshtym inguruan.

Istripu Nuklearren Nazioarteko Eskalan seigarren maila eman zioten, eta historiako hirugarren istripu nuklear larriena izan zen –Fukushima Daiichiko hondamendi nuklearraren eta Txernobylgo istripuaren atzetik, biak zazpigarren mailakoak–.

1.000 kilometro koadroko eremua hustu zuten, eta 250.000 lagun inguruk erradioaktibitate dosi altuak jasan zituen. 200 lagunetik gora hil ziren.