Egin egunkaria bahitu zuen Espainiako Poliziak. Madrilgo 1. Epaitegi Zentralak aginduta, eskandalu publikoa egotzi zion Eginen zenbaki hari. Eskolako liburu gorriaren hainbat atal zituen barnean zenbaki hark, haurrei arau sozialak zalantzan jarri eta haien aurka protesta egiteko moduez, sexualitateaz zein droga kontsumoaz mintzo zitzaiena. Bigarren tirada bat atera zuten, orrialde horiek kenduta eta “zentsuratua” hitza lehen orrialdean nabarmenduta. Frankismoaz geroztik egunkari bat bahitu zen lehen aldia izan zen.