Bilboko Kafe Antzokiak ateak zabaldu zituen, euskararen arnasgunea Bilboren bihotzean. Euskara irakasten ari zen talde batek abiatu zuen proiektua, euren ikasleek ikasgelatik kanpo euskarazko harremanak eta aisialdia izateko zituzten aukera urritasunak bultzatuta. San Vicente zinema aretoa izandako lokala zaharberritu zuten, Bilboko euskaldunen topagunea izateko bokazioz sortutako Kafe Antzokiari bide emateko, proiektuaren bideragarritasun ekonomikoan lagunduko zuen ostalaritza proiektuak lagunduta. Egun, Gabriel Aresti euskaltegia, Bilbo Hiria irratiaren egoitza, jatetxea eta erabilera anitzeko aretoa dauzka, eta erreferentzia da Euskal Herrian zuzeneko musikari dagokionez.