Jaurlaritzak "bortizkeriaren kausak eta jatorriak" aztertzeko kontratatutako taldeko kideak nor ziren argitaratu zuen ARGIAk. Maiatzean jakinarazi zuen Lakuak talde batekin ari zela lanean, baina ez nork osatzen zuten. Clive Rose, Franco Ferracuti, Hans Horchem, Peter Janke eta Jacques Leaute ziren “adituak”, Afrikako herrialdeetan gerra kolonialean arituak, ezkertiarren aurkako NATOren plan kontrairaultzaileen diseinatzaileak eta gerra zikinaren zein frankismoaren defendatzaileak, besteren artean. Eskandalu handia sortu zuten ARGIAk zabaldutako bakoitzaren biografia haiek.