Itxialdia abiatu zuten Gipuzkoako Aldundiaren egoitzan 50 ekintzaile antinuklearrek. Lemoizko zentrala geldiaraztea zen xedea, eta Aldundiko langileek eurekin elkartasunez grebara deitu zuten. Eraikinaren balkoitik pankarta eskegi zuten "desobedientzia zibila" leloarekin. Beste hainbat instituzioren egoitzetan ere itxialdiak abiatu zituzten, eta 50 udaletxe okupatzera ere iritsi ziren. Hilabete geroago Bizkaiko Aldundian itxi ziren, eta 22 hautetsi atxilotu zituen Espainiako Poliziak.