Iruñeak armada gaztelarraren aurrean kapitulatu zuen. Albako dukearen milaka soldaduek hiria inguratuta zeukaten, eta hiriko agintariak errendizioa negoziatzen saiatu ziren arren, dukeak mehatxu egin zuen, berehala kapitulatu ezean hiria suntsituko zuela. Biharamunean sartu ziren gaztelarrak San Lorenzo atetik. Hainbat urtez Nafarroako Erresumaren aurka konspiratzen aritu ondoren, Gaztelako errege Fernando faltsarioak inbasioa abiatu zuen uztailaren 21ean, Albako dukearen aginduetara ziren 12.000 soldadurekin. Nafarrek beren burujabetzaren alde borrokatu arren, ez ziren gai izan gaztelar armada indartsuari eusteko.