Niretzat Talaios kooperatibaren eta Olatukoopen bitartez kooperatibismoan eta ekonomia eraldatzailean jardutea zer den galdetzen didatenean, erantzuten dut izan dela lanaren eta kolektiboaren bitartez emantzipaziorako bideari ekiteko aukera. Eta bide horretan, oso garrantzitsua izan da KoopFabrika eraikitzen jardun izana lankide eta kooperatiba askorekin, baina baita unibertsitateetako GEZKI eta LANKI ikertegiekin ere. Guk sorreran izan ez genituen formazioa, bide-laguntza eta saretzea, besteentzat sortzeko aukera eman digun interkooperazio tresna baita. Praktikarekin eta ikerketarekin zortzi urtez eraikitzen eta hobetzen joan garena, denontzat eskuragarri dauden tresna, ezagutza eta metodologiekin. Baina denontzat den bidea da benetan?

Identifikatu dugun erronkarik handiena da abiatutako bidea denontzat izatea, eta bereziki, gure jendartean egoera prekarizatuenetan dauden pertsona eta kolektiboentzat. Baina nola eraiki proiektu auto-eratuak, jendartean ikusezin bihurtu ditugun pertsonen bizitza proiektuak sortzeko baldintzarik ez badago, eta auto-eraketarako beharrezkoak diren subjektu saretuekin harremanik ez badugu? Epe luzeko prozesuak garatzea ezinbestekoa da.

Enarak kooperatibaren sorrera bide-laguntzeko aukera izan genuen KoopFabrikan, Gasteiztik Euskal Herri osora emakume migratuei ahalduntzeko formazioa eta aholkularitza ematen dizkiena. Tania eta Katherinek gidatuta erronka kolektiboari eutsi eta epe luzeko KoopFabrika Hegoaldetik proiektua martxan jarri dugu, bermatu nahi duena ekonomia sozial eraldatzailea eta kooperatibismoan murgiltzea denontzat irisgarria izatea, formazioa, bide-laguntza eta saretzea eskainita.

Urte bizia izan da, Andaluzia, Madril eta Kataluniara eraman gaituena pertsona migratuek sortutako proiektuak ezagutzera, beharrak, zailtasunak eta egiteko moduak ezagutu eta sarea egiteko baliatu duguna, urriaren 6 eta 7an Hernanin Ertzeko bizitzak eraldatzeko ekintza kooperatiboa jardunaldiak antolatzeraino.

Ikasi dugu kooperatibismoak eraldatzaile izateko antiarrazista eta dekoloniala izan behar duela, zapaltzen gaituzten ardatzetatik eta ditugun pribilegioetatik abiatuz proiektu eta sare sendoak sortu ditzakegula, ertzeko bizitzak eraldatzean denon bizitzak eraldatzen eta hobetzen ditugulako. Sortzen ari den sarean bidelagun izaten jarraituko dugu.

Bide on, KoopFabrika Hegoaldetik, eta atzerritartasun legeak indargabetu ditzatela orain!