Aurreko batean ea ezagutzen zintudan galdetu zidaten, eta ez nuen erantzuten jakin. Bitxia da norbait ezagutzea, edo norbaiten berri izatea ezagutzen duzula kontsideratzeko beste. Nik ere ez dakit zenbat datu behar ditudan, zein irizpide bete behar ditugun elkar ezagutzen dugula esateko.

Sare sozialek eta era digitalaren paradigmak kontzeptuen ulerkera berria eskatzen dute halabeharrez. Harremanen berkontzeptualizazioa, ezagutzarena... Orain edo duela hamar urte norbait ezagutzea ez da gauza berdina. Nik ezberdin ulertzen dut, horregatik ez nuen erantzuten jakin. Berez, ofizialki, ez omen zaitut ezagutzen. Ez gaituzte inoiz aurkeztu, eta orain arteko ulerkeraren arabera, behintzat, pare bat hitz gurutzatu behar ditugu (gutxienez) elkar ezagutzen dugula kontsideratzeko. Edo bitartekariren batek ofizialki aurkeztu, eta bi muxu eman behar ditugu (gutxienez). Orain dela gutxi arte (akaso, pandemia arte) horrela zen. Beraz, ez. Ez dugu elkar ezagutzen.

Ez dugu elkar ezagutzen, baina badakit aurreko asteburuan Alde Zaharrean irten zinela. Badakit beti zerbezak edaten dituzula, eta Marlboro erretzen duzula. Badakit Belako, Rotten XII, Anari, Joancho Marques, Nirvana eta Ruper gustatzen zaizkizula. Badakit mendira joaten zarela asteburuetan, eta korrika ere egiten duzula osasuntsu mantentzeko. Badakit duela bi hilabete ile apaindegira joan zinela, eta betikoa egin zenuela beste behin. Badakit ebakia hartzen duzula eguerdietan. Badakit zein alderdi politiko bozkatzen duzun, eta badakit zer iritzi daukazun txertoen inguruan. Badakit gurasoen kotxea erabiltzen duzula. Badakit zer ikasten duzun, eta zertan ari zaren lanean. Badakit zure koadrillakoak nortzuk diren. Badakit atzo galtzerdi zuriak eraman zenituela, eta badakit zein den irakurri duzun azken liburua. Ezagutzea norbaiten egunerokoaren, pentsaeraren eta egoeraren berri izatea ez bada, ez dakit zer den. Aurrez aurre sekula egon ez bagara ere, harreman birtual horiek gehiago eman didate zure egunerokoaren berri, betidanik nire inguruan, nire herrian, ezaguntzat nituen besteez dakidana baino.

Ez nuen erantzuten jakin, baina berriro galdetuko balidate “erdizka” esatera ausartuko nintzake. Hori bai, espresuki ezagutzea nahi duzun hori bakarrik ezagutzen dut: zure bertsiorik onena, zure argiak, zure talentuak. Azaletik haratago, harreman birtualek ez diezagutela gure plastikozko bertsio onenaren atzekoa ukatzera eraman. Ukatuz gero, ezin ezagutu. Ezagutu gabe, ezin onartu, ezin landu, ezin itzalak argitu.