Apalentzako apalak
Euskal kulturaren alderdirik abangoardistena, sormen berritzaileena bildu eta erakustea da Loraldia Festibalak bere buruari jarri dion xedea, baina urtero hartzen du iraganera begiratzeko tartea. Aitzindariek ezarritako zimendurik gabe, nekez izango genukeelako gaur euskal kultura berritzeko oinarririk.
Noiz: Martxoaren 24an, igandea
Non: Bilboko Arriaga Antzokian
Oraingo hau baino garai ilunagoetan euskal kulturaren itsasargi izandako Verdes liburu-denda gogoan hartu zuten Arriaga Antzokian, 1973tik 2005era arduradun izan zituen Javi Escudero eta Asun Zuloaga omentzeko ekitaldian. Haien lan isilari esker, kulturak, jakintzak eta euskarak arnasbidea topatu zuten Bilboko Posta kaleko denda estu hartan. XX. mende hasieran inprimategi eta liburu-denda izandakoa gainbeheran zela hartu, eta erreferente bihurtu zuten.
Idazle, musikari eta pentsalarien aterpe izan zen Verdes. Esate baterako, Bernardo Atxaga gaztearentzat, Bilbora heldu berria zela. “Apalentzako apalak” topatu zituen han, inspiraziorako iturri agorrezina. Diktaduraren azkenetan eta ondorengo urteetan, non aurkitu atzerriko idazleen harribitxiak, euskarazko nobedade guztiak (hainbeste ere ez ziren garai hartan), testu klasiko ahaztuak?
Xabier Peñaren euskara ikasteko metodoa izan zen Natxo de Felipek Verdesen erositako lehenengo liburua, euskarazko autore zaharrak eta berriak ezagutzeko giltza. Miren Agur Meaberentzat ere, mundu berri baterako atea izan zen Verdes, “oroitzapenen mosaiko” baten bidez gogoratu zuenez. Joseba Sarrionandiak maiz bisitatu zituen apalategi haiek: Gutun bidez agertu zen Arriagan, Ane Pikaza aurkezlearen ahotsean.
Liburuen usaina, ohiko erosleen arteko elkarrizketen zurrumurrua, sumatu zitezkeen igande eguerdi hartan, Verdesen oroitzapena biziberritu zuen saioan. Musika ere ezin falta, Gorka Benitez, Ruper Ordorika eta Juan Carlos Perezen eskutik. Zenbat disko saldu ote zituzten Verdesen? Zenbat zaleren belarrietara heldu ziren lehenengoz haien doinu berriak?
Saioa amaitzeko, Bernardo Atxagak hartu zuen hitza berriro. Zerura igo zen une batez, eta han aurkitu zituen Ricardo Toja, Jorge Oteiza, Txema Larrea, Gabriel Aresti, Imanol Berriatua, Txoko Ederreko Andone, Andolin Eguskiza... lasai asko solasean. Baina haiek guztiak joanak dira, 2005ean Verdes joan zen bezala, mendea bete baino urtebete lehenago, garai berrien abiadurak irentsita, merkatuaren arau gupidagabeek menperatuta. Zorionez, Verdesen ametsari eutsi ziotenak gure artean daude, eta Arriagan batutako jendetzaren txaloak izan ziren haientzako omenaldirik beroena.
Elkargunerako eta hausnarketarako espazio izateko sortu berri dute Eva Forest liburutopia Gasteizko erdigunean. Liburuak baino, jakintza dute oinarrian. Pentsamendua, memoria eta transmisioa. Pentsatzen gozatzea. Kafetegia eta liburu denda korridore labur batek eta umeen txokoak... [+]
Frantzian bereziki, baina mundu erdian barrena ibiltzen da Aritz Otazu XVI. eta XVII. mendeetako liburuen bila. Nafarroako eta Euskal Herriko historia ezagutzera ematea da bere pasioa eta zuzentzen duen Mintzoa Argitaletxearen xedea. Mintzatzen ematen du egun osoa: bezeroekin,... [+]
Danele Sarriugarte idazleak euskaratutako David Thoreauren Walden liburuak jaso du Nafarroako Liburu Denden Elkartearen euskarazko libururik onenaren saria.
Amazon ahalguztidunak bidalketa gastuak kobratu gabe banatzen ditu liburuak, baina liburu denda txikiek ezin dute halakorik egin, bizirauteko etekin duin bat jaso nahi badute. Horri aurre egiteko, zehazteke dagoen gutxieneko bidalketa gastu kopuru bat kobratzera derrigortuko du... [+]
Durangoko Azokak iragarri du Euskal Herriko hainbat lekutan kontzertuak antolatuko dituela abenduaren 5etik 8ra. Helburua: pandemiaren aurkako neurrien eraginez Durangora joaterik izango ez dutenei ere Azokako giroa hurbiltzea. Gainera, urtarrileraino luzatuko dute Durangorekin... [+]
Nerabe garaiko irakurketa ia erabat ahaztuta, Irungo karrika nagusiko 16.enean eskuratu nuen Irene Aldasororen itzulpen bikaina den Gailur ekaiztsuak. Bereziki inspiratuta ez nengoen egun batean izan zen, zerbait nahi baina zehazki zer nahi duzun ez dakizun egun horietako... [+]
“Batzuetan liburu-denda txikiei lotutako ideia erromantikoa daukagu, baina errealitatea ez da hain erromantikoa”. Liburuaren industrian, denda txikiak azken putza zergatik diren garbi azaldu digu Ylenia Benitok. Irungo Brontë liburu-denda asmoz beteta zabaldu... [+]
Iruñeko Kale Nagusian dagoen liburu-denda, kafetegi eta areto kooperatiboak “Zurekin bai ala bai” kanpaina jarri du martxan, proiektua sostengatzeko bazkide berrien bila.
Katakrakeko Hedoi Etxarte eta Karrikiriko Jon Bujandarekin solastatu gara, ezagutzeko nola egokitu dituzten salmentak egoerara, eta nola egiten ari diren orain denda fisikoak irekitzeko prozesua.
Euskal kulturako editoreak kexu agertu dira Eusko Jaurlaritzak industriarako diru-laguntzarik iragarri ez duelako. Euskal Autonomia Erkidegoko liburu dendetako langileen %95a ERTEan dagoela jakinarazi dute, eta kulturgileentzako eskainitako laguntzak industriara ere bideratzen... [+]
Liburu-dendak itxita daude konfinamendua agindu zutenetik eta, bitartean, Amazon bezalako plataformek saltzen jarraitzen dute hemen eta ia mundu osoan. Hori bai, liburu-dendak dauzkatenek autonomoen kuota berdin-berdin ordaindu behar izan dute martxoan. Egoera hori salatu du... [+]
Iruñeko liburu-saltzaileen artean Abarzuza familiak toki berezia du, 1944an Andres Abarzuzak lehen denda zabaldu zuenetik.
Egun, haren bilobek jarraitzen dute liburuen negozioan. Horietako bat Martzela da, Santo Domingo aldapako denda xarmangarriko nagusia. Garai batean... [+]
Atera naiz Marianen janari dendatik, dozena bat kroketa erosita, oilasko bular bat xerratan (“finak mesedez”) eta parean tokatu direlako poltsan bukatu duten beste pare bat gauza, hasten naiz etxerantz eta kalea gurutzatzen ari naizela ikusten dut afixa eskaparatean:... [+]
Parisko Udalak 250.000 euroko diru-laguntza iragarri du liburu-denda independenteentzat, hirian dauden mota honetako negozioak mantentzeko eta berriak irekitzea bultzatzeko. Parisko liburu azokaren 39. edizioa ostiral honetan hasiko da eta ekitaldi horren atarian eman dute... [+]