Errenazimenduko liburu elektronikoa
Liburu elektronikoek hainbat alde on dituzte: besteak beste, hainbat liburu nahi dugun orrialdean zabaltzeko aukera ematen dute. Bada, Agostino Ramelli (1531-1600) militar, ingeniari eta asmatzaile italiarrak aukera hori ematen zuen tramankulua asmatu zuen lau mende pasatxo lehenago.
Liburuen Gurpila jarri zion izena, eta egurrezko noria birakari modukoa zen, dozena bat ohol zituena. Ohol bakoitzean liburu bat jar zitekeen eta irakurleak nahi zuen orrialdean irekita eusten zion. Hala, gurpila biratuz, liburuak modu ia automatikoan kontsulta zitezkeen.
Desabantaila bat nabarmentzekotan esan behar da Ramelliren gurpila ez zela egungo liburu elektronikoak bezain eramangarria.