Komunitatea gora eta komunitatea behera. ARGIAko hauek ez daukate besterik buruan. Eta txikiaren kontu hori... Noiztik goaz euskaldunok txikira? Hordago handira beti! Baina bueno, berezi xamarrak izan dira beti ARGIAkoak, eta horretan utziko dugu.

Iragarri dute 2016ko ARGIA Eguna; Ondarroan izango da, urriaren 1ean. Eta komunitatea sendotzearen kontu horrekin, hasiak dira lehen bilerak Lea-Artibaiko lau herritan. Euskal Herriko eskualde euskaldunena da eta euskarazko komunikabide txikiarentzat balio berezia du horrek. Baina eraldaketa sozialean eta herrigintzan diharduten eragileak aktibo dauden ingurua ere bada, eta ARGIAren baloreek festa egunean presentzia izan dezaten beharrezkoak dira talde eta norbanako hoiek. Eskualdeko harpidedunei ere bidali zaie eguna antolatzeko lanetan parte hartzeko gonbita. Guztien artean ARGIAk bere egiten dituen baloreetan oinarritutako jai egun txikia prestatzea da helburua, komunitatean; ARGIAko lantaldea, harpidedunak eta eragile eta norbanakoak elkarlanean; baloreak praktikan jarriz; eta kuantitatiboari baino kualitatiboari, egiteko moduari garrantzia emanez.

Lehen harremanak garatzeari udaberrian sartzearekin batera ekin zaio. Gerturatu dira talde feministak, natur taldeak, kultur eragileak, euskalgintzan dihardutenak, memoria historikoaren gaia lantzen ari direnak... Dena dela, irekiak dira bilerak eta sarean emango da deialdien berri. Gerturatu eta lagundu nahi duena ongi etorria izango da.

Egitaraua zehaztu gabe dago, baina aurten ere izango dira inguru natural eta kulturala ezagutzeko ibilaldiak, bertako produktuekin prestatutako herri bazkaria, naziotasun agiri arrotzen 3. jaurtiketa edo ARGIA zaleen Topaketa. Oraindik, baina, argitu ez zaidan zalantza bat dabilkit buruan: nola egingo dute aurtengo kartela, ondarrutarrez? ARGIA Egune Ondarrun ixengo ra edo horrelako zerbait imajinatzen dut.