ARGIA astero etxean jasotzen duenak ongi ezagutuko du Gunea, eskaintza, opari eta zozketen txokoa; eta agian noizbait egona izango da zer edo zer tokatu zaionaren bila, bere izena sariren baten azpian irakurriko duenaren esperantzan. Ikusiko zenuen dagoeneko, irakurle, astekaria berrituta datorkigula oraingoan, eta Gunea bera ere ez da eraberritzetik salbu. Guztiok osatzen dugun komunitateari zuzenean lotuta dagoen txokoa balioz bete nahi izan dugu. Agian lehen begiratura deigarriena denbora aldaketa irudituko zaizu, asteroko zozketa egitetik hilabetekora pasako baita. Badauka bere azalpena. Eraldaketarako barne prozesu sakon batean sartuta gauden honetan “txikitik eragiten” daukagu lematzat, filosofiatzat; eta eskaini nahi duguna kantitatez txikiagoa bada ere kalitatez ona izatea lehenesten dugu; balioei daukaten garrantzia emanda.

Gizarte mugimenduek beteko dute Gunea. Zozketa batean ere hartu baitezakete toki inportantea. Sariak ere birplanteatu nahi izan baititugu. Hilabetean balio edo gai bat landuko dugu ARGIAn, eta Gunea horri lotuta joango da, guk barneko lanketa egitearekin batera gure komunitate guztiarekin elkarbanatuz aurrera daramagun prozesua. Eta zozketan sartuko ditugu jorratutako gaiari lotuta egon daitezkeen herri eragileen produktuak, herri mugimenduarekin elkarlanean eman nahi baititugu ezagutzera euren proiektuak. 

Kanpokoak garrantzia du, bai, gure burua engainatu ere ez dugu egingo; eta horregatik egin dugu itxuraldaketa. Baina itxuraldaketa horrek edukietan sakontzearekin du zuzeneko harremana. Aldaketaz baino, eraberritzeaz ari gara: erak, moduak berritzeaz. Eta horri eskutik emanda doaz edukietan sakontzearekin batera gure balioak ARGIAko txoko guztietara zabaltzea. Balioak eta edukiak artikulu eta ikus-entzunezkoetan landu daitezke, baina jarrera bat ere badira, eta pausu hori eman nahi dugu, gure komunitate osoarekin batera; globalean pentsatuz baina txikitik eraginez.