Ondo bizi al gara? Horrela bizi nahi al dugu? Denok horrelako bizitza izateko aukera al daukagu? Eta emakumeak duintasunez bizi al gara? Ekonomia feministak sustraietaraino arakatu nahi du gaur egungo sistema kapitalista. Teoria kritiko horren ustez, merkatuetan oinarritzen den eredu kapitalistak ederki asmatu du merkatuak iraunarazteko atzean behar den egitura guztia ezkutatzen. Hitz bitan esanda, mundu produktiboa eta erreproduktiboa banatuak ditu; lehena oraindik ere gizonentzakoa, ezinbestekoa, eta bigarrena emakumeek sostengatua, nahita ahaztua, gutxietsia.

Ekonomia feministak bizitzaren erdigunetik merkatu kapitalista kendu eta denon artean adostuko dugun bizimodu duina ezartzea proposatzen digu. Pentsaera kritiko hori bidelagunekin datorkigu; ekologismoari eta ekonomia solidario eta sozialari eskutik helduta. Horren adibide da Larrun honetako lehen zatia, Amaia Perez Orozco eta Carlos Askunzeri egindako elkarrizketa. Teoriatik praktikara joko dugu ondoren, eta Gipuzkoako Foru Aldundiko Emakumeen eta Gizonen Berdintasunerako II. Foru Plana ezagutuko dugu. Urola Garaian alternatiba ekonomikoak lantzeko ematen ari diren urratsak ere kontatuko ditugu.