Jasangarritasuna
Zurezko pieza multzo bat mahaia
gaztelu forman jarria,
azken punturik bako bertsoa
mikrofonora ekarria,
ingurumena, ekonomia,
herri baten aldarria...
deus ez da jasangarria
oroit gaitezen lantzeaz gure
proiektuen oinarria.
Miren Amuriza
Lurraldetasuna
Nork esan zuen zazpigarrena
izango zela Araba?
Norentzat daude iparraldean
Aiziritze eta Sara?
Bat zergatik da Antiguokoa
bestea Nafarra bada?
Estadistika ta datuetan
denak kabitzen al gara?
Ez ahantz norbere esku daudela
hitzak eta begirada.
Sustrai Colina
Parekidetasuna
Zenbat ta zenbat aldiz esana:
"Emakumeak etxean"
Orain harritu egiten gera
holakoak aditzean.
Hala ere harro ezin sentitu
adibidea jartzean
azalpenetan gabiltzalako
pauso txiki bakoitzean
edo gordeta besteak gaizki
egin duena(re)n atzean.
Rosi Lazkano
Ekonomia soziala
Ekonomiaz zenbat kalaka,
zenbaki, indize, txosten...
Goitik beherako egituretan
boterea da egosten.
Saia gaitezen geure sosaren
burujabetza erosten,
truke-sistemen eta merkatu
txikien mozkinez pozten:
gure amonek zekiten eran
patrika-zuloak josten.
Uxue Alberdi
Euskalzaletasuna
Herriak behar du parekide
dadin askea gorputza
Naturarekin jasangarria
kalteko da zapalkuntza
Ekonomia sozialduna
ez giltza gutxiko kutxa.
Baina gureak jarraituko du
izaten herri bat hutsa,
horiek denen ardatz ipintzen
ez den artean hizkuntza.
Julio Soto
Euskalzaletasuna
Aktualitate berdintzailea
dabil frenesiak jota,
txio baten zain politikoak
zer lelokeria bota,
tiro baten zain lur urrunetan
noiz hasiko elkar joka,
eta ARGIAk, ez izatea,
hori du bere erronka,
mundua beste denek bezala
txehetzen duen errota.
Egunkariek goizean kaixo
eta iluntzean aio
astekariek nahiago dute
zazpi egunez behin jaio,
berandu heldu liteke baina
askotan berdintsu zaio,
arnasa hartu nahi duenari
ARGIAk hori damaio:
abiadura txikiko tren bat
gure hitzaren karraio.
Amets Arzallus