Argiaren proiektuaz, produktuaz, etorkizunaz hitz egiteko topagune bilakatu zen Usurbil irailaren 27an, eta komunitatearengana gerturatzeko aprobetxatu genuen.
Argia komunitatea oinarri hartuta lehen harria jarri genuen irailaren 27an Usurbilen, Argia Egunean, denon artean eraikitzen jarraitu nahi dugun proiektuarekin. Ekintza ugariz osatutako egitaraua aurkeztu genuen, guztiak ere filosofia baten inguruan prestatuak, eta egun guztian zehar presente izan genituen gure lagunei, lankideei, irakurleei zabaldu nahi dizkiegun eta gure etxeak dituen baloreak: lurraldetasuna, parekidetasuna, partehartzea, euskaltzaletasuna, jasangarritasuna… “Jende txiki askok, leku txikietan gauza txikiak eginez mundua alda dezakete”, zioen Axier Lopez lankideak egunaren hasieran, frontoiko pankarta bati aipamena eginez.
1919an Zeruko Argia bezala sortua, koska ugari pasea, teknologia berrietan murgildutako garai hauetara moldatzen ari da. Baina bide horretan ematen ari garen pausoak ez ditugu soilik gaur Argia osatzen dugunon artean erabaki nahi, irakurlea eta harpidea baitira gure proiektuaren hauspo. Gardentasunez jokatu nahi dugu Argiazalearekin eta proiektuaren parte sentiarazi nahi dugu, denon artean komunikabide sendo eta independente bat osatzeko. Horren harira antolatu genuen irailaren 27an Usurbilen Argia Eguna, Argiazale guztion elkargunea, egun bat Argiaren baloreetan. Ez kasualitatez Usurbilen, lehen ere egin baitzen Argia Egunik herri horretantxe. Orduan ere Usurbilgo Argiaren lagunak ez ziren urruti, eta taldea omenduz ekin genion larunbat argitsuari. Baina hitzez behin eta berriz aipatu genituen arren, ekintzetan, praktikan erakutsi nahi izan genituen jomuga horiek; aldarri ditugun balore horietan oinarrituta irudikatzen dugun ereduan egun batez bada ere bizitzeko aukera izan. Txikitik egindako gauzak baloratu, globalean pentsatu eta txikian ekin.
Komunitate oso baten topagune bilakatu zen egun batez Usurbilgo dema plaza, elkarrekin proiektu komun bat eraikitzeko gogotsu; baina proiektu horren parte da, baita ere, komunitate geroz eta zabalagoa eta anitzagoa osatzea. Ez da erraza. Betiko borroka da. Baina indarrak hor jarri behar ditugulakoan gaude, eta gaur gure komunitatearen parte direnekin batera egin nahi dugu hori ere, noski. Telefonozko “bezero bilaketatik” ihes egin eta tokian tokira jo nahi dugu, bertan egon, leku bakoitzeko errealitatea ezagutu eta hortik abiatuta eragin, modu batean edo bestean, lekuak agintzen duenaren arabera. Gogoz gaude, laguntzeko, elkarlanerako, eta darpidegun guztiok Argian, Kike Amonarrizek Argia Eguneko bazkaloste umoretsuan egindako aditz konjugazioak dioen moduan.
Baina 2014ko Argia Eguna ez da beste mugarri bat gehiago. Atzo bezala, bihar ere argituko du egunak eta lanean jarraitu beharra dago. Prozesu berri baten oinarria jarri besterik ez dugu egin, eta ondoren dator lan gogorra; astero gure irakurleari ahalik eta edukirik onenak banatzen jarraituko dugu, eta eurekin batera herrietara, auzoetara, elkarteetara salto egiteko asmoa daukagu, elkarrekin gauzak antolatzen hasi, proiektuak martxan jarri. Ez dezagun ordea Argia Egunean ereindakoa alde batera utzi; ikus dezagun segidako irudiotan zer eman zuen egunak.