Hayley Saul Yorkeko Unibertsitateko (Erresuma Batua) bioarkeologoak Europa Iparraldean duela 6.000 urte jakiak egosteko erabiltzen ziren zeramikazko hainbat ontzi aztertu ditu. Morkoen barnealdea karraskatuta lortutako laginetan, besteak beste, egungo baratxuri-belarraren (Alliaria petiolata) antzeko landarearen arrastoak topatu ditu. Balio nutritibo eskaseko landarea izaki, Neolitoko gizakiek espezia gisa, jakiak urrintzeko, erabiltzen zutela ondorioztatu du. Saulen hitzetan, “nekazaritzarako trantsizio garaiko ehiztari-biltzaileek jakiak prestatzeko jarrera sofistikatua zuten”.