Sushi Books euskal letren mundura heldu berri den argitaldariak Ostiral albuma jarri digu eskura. Robinson Crusoek uharte galdu hartan izan zuen adiskide mina dugu protagonista, Ostiral, sakrifiziotik libratutako indigena. “Baliteke niri buruz zerbait entzun izana, baita nire lagun

Robinsoni buruz ere, baina beti haren ahotik izango zen. Orain nik kontatuko dizuet nola ezagutu nuen gizon zuria”.

Hala, bigarren planokotzat jotakoari ahots nagusia emanik, lehen ezaugarri nagusia balioetsiko diogu liburuari: beste perspektibak kontuan hartzea, historiak gutxietsitakoari behar duen garrantzia ematea; lehen lerrora ekarriz, bestearen pare jartzea, berdintzea. Nolakotasun ederrak ageri ditu, bestela ere, istorioan barrena, gehienak Ostiralek gorpuzturik: pazientzia, errespetua, ahula babesteko sena...

Baldintza latzetan elkartu diren bi gizonen arteko laguntasun pitzaezina da ipuinaren mamia. Hunkitu egiten du Crusoeren azken lerroetako aitortzak: nahiago galduta baina laguna ondoan, zibilizazioko bakardade engainarian baino. Adiskidantza galtzeak eragingo lukeen nahigabea sentitu egiten da.