Hidrogenoa erregai modura duten automobil elektrikoen inguruan ikerketa ugari egiten ari dira, baina oztopo gaindiezin bat izan dute beti: hidrogenoa lortzeko platinoa behar izatea. Platinoa eskasa da naturan, eta ondorioz garestia. Hura ordezkatzeko egindako ikerketa lan gehienek porrot egin dute.
Kopenhageko Unibertsitateko Mathias Arenz-ek zuzendutako ekipoak platinoarekiko menpekotasuna gutxitzea lortu du, hainbat katalizatzaile erabiliz. Ikertzaileek lortutakoaren arabera, egun bateria bakoitzean behar den platino kantitatearen bostena baino ez da beharko.
Teknologia pixkanaka aurrera egiten ari den bitartean, zertan da auto elektrikoen merkatua? Orain bizpahiru urte aurreikuspen oso interesgarriak egin ziren, Europan bederen, baina ari al dira betetzen? Ikusten al da bateriak kargatzeko entxufeen eraikitzea areagotu denik?
Gaiak artikulu sakonago bat merezi du, baina aurrerapen gisa aipa dezagun Espainiako Estatuan azken hiru urteetan gertatutakoa: Zapateroren gobernuko kide Miguel Sebastianek iragarri zuen 250.000 kotxe elektriko zirkulatuko zutela 2013an espainiar errepideetan, baina une honetan ez dut uste 10.000 baino gehiago dabilenik.