Irlandako lurjabeentzat lan egiten zuen ofizial ingelesa zen Charles Boycott. Lurren eta etxeen jabetza gauza sakratuen pare jarririk, gupidarik gabe tratatu zituen euren bizilekuetatik egotzitako maizterrak. 1880an, Irish Land League nazionalistak antolatutako ekimen zabalago baten barnean, Boycotten aurkako isolamendu kanpaina abiatu zen herrian: bere nekazariek batu gabe utzi zuten uzta; etxeko zerbitzariek bertan behera utzi zuten garbiketa; dendariek ez zioten ezer saltzen, ez eta postariak gutunak eramaten. Azkenean, urte hartan bertan alde egin behar izan zuen Irlandatik, historiarako utziz hizkuntzarteko hitz indartsu bat.
Duela aste batzuk saiatu da BBK gure seme txikiaren ikasgelako ume baten etxea kentzen, eta forma akats batengatik soilik atzeratu ahal izan da enkantea. Nik Kutxabankeko lehendakariari idatzi diot gaur, Charles Boycotten historia azalduz eta familia hau egozten badute aurrerantzean nire sosak usaindu ere ez dituela egingo hitz emanez.
Egungo krisia munduko jabe handiek herrien aurka abiatutako erasoa da, nagusiki. Elkartasunak, eta ez teknokraziak, aterako gaitu zulotik.