Mondragon Korporazioak ez ditu baztertu balizko itun estrategiko berriak, eta negozioen neurria merkatu globalari egokitzearen alde nahiz goraka ari diren merkatuetara jotzearen alde egingo du. Halaber, hazkunde ahalmen txikiena duten jarduerak birbideratzeko prest dago, eta proiektu integral korporatiboen aldeko apustu irmoa ere egin du. Aldaketa edo egokitzapen horiek guztiak beharrezkoak izango dira kongresuaren helburu nagusia lortzeko: kooperatiba osatzen duten enpresen egiturak, balio erantsia duen enplegua sortzeko moldatzea.

Norabide horiek Arrasaten, pasa den irailean, Mondragon Korporazioaren urteko kongresuan hartutako erabakien parte dira. Urteko kongresuan taldeko kooperatiba guztietako 650 ordezkarik esku hartu zuten. Halako kongresuen helburua korporazioa bideratuko duten arau eta irizpide orokorrak zehaztea da. Hau da, interes komuneko funtsezko gaiei buruzko oinarrizko politikak definitzea.

Mondragon Korporazioa Euskal Herriko enpresa eta kooperatiba talde garrantzitsuena da. Industria taldeak, finantza arloak (Euskadiko Kutxa eta Lagun Aro) eta banaketa taldeak (Eroski) osatzen dute. 2010eko ekitaldiaren amaieran, euskal korporazioaren aktiboa 33.099 milioi eurokoa zen; 178 milioi euroko etekin sendotuak izan zituen; eta mundu osoan 83.859 langile ditu, gehienak kooperatibako kideak.

Gizarte eta enpresa politika 2013-2016

Mondragon Korporazioko aurtengo kongresuak korporazioaren etorkizunerako funtsezkoa den dokumentu bat aho batez onartu zuen: Gizarte eta enpresa politika 2013-2016. Dokumentuak korporazioaren ikusmoldea eta erronkak nahiz enpresaren oinarrizko jarduera ildoak zehazten ditu. Jakina, kide kooperatibistek dokumentua aurrez eztabaidatu zuten, eta, ondoren, kongresuan bildutako ordezkarien bidez (650 lagun), onartu egin zuten.

Dokumentu horrek ondoren kooperatiben plan estrategikoak landu ahal izateko abiapuntua ezarri du. Eta erronka bat jarri du mahai gainean: “gure enpresa egitura egokitzea” balio erantsiko enplegua sortzeko. Laburbilduz, eta Mondragon Korporazioko arduradunek adierazi dutenez, hauek dira datozen urteetako helburuak: negozioen lehiakortasuna hobetzea, pertsonen konpromisoa eta izaera kooperatiboa indartzea, negozio errentagarriak eta iraunkorrak dituen enpresa taldea izatea, balio erantsiko enplegua sortzeko bidean.

Oinarrizko jarduera ildoak

Helburu horren bila, kongresuak lau estrategia edo jarduera ildo zehaztu ditu. Lehena, dimentsionatzea eta nazioartekotzea, merkatu globalean neurri egoki eta lehiakorra aurkitzeko. Bigarrenik, berrikuntzak, sustapenarekin eta ezaguerarekin batera, negozio ereduak etengabe berritzea eta etorkizuna duten sektoreetan jarduerak sustatzea ahalbidetu behar du. Hirugarrena, interkooperazioa, elkarlana kooperatiben artean nahiz kanpoko aliatuekin, merkatuko aukerak hobetzeko eta irtenbide integralak nahiz balio erantsiko zerbitzuak eskaintzeko. Azkenik, laugarren lan ildoa konpromisoa eta identitate kooperatiboa bultzatzea da, ezaugarri kooperatiboak indartuz, eta ezaugarri horiek korporazioaren balioekin, printzipioekin eta kudeaketa ereduarekin bat datozen jarreren bidez adieraziz.

Aldaketak eta egokitzapenak

Erronka honek taldearen enpresa politikan aldaketak eta egokitzapenak egitea eskatuko du, kooperatibistek erabaki bezala. Hala, negozioen neurria merkatu globalera egokitzeko eta goraka ari diren merkatuetara jotzeko asmoa dute; badira urte batzuk merkatu horietan lanean hasi zirela. Halaber, balizko itun estrategiko berriak lantzea eta hazkunde ahalmen txikiena duten jarduerak birbideratzea dute xede. Azkenik, proiektu integral korporatiboaren aldeko apustu garbia egin dute.

Hemendik aurrera, estrategia zehazteko balio duen politika hori onartuta, 2012ko kudeaketa planak giltzarri horietan oinarritu beharko du. Horrez gain, hurrengo urtean kooperatibek hausnarketa egin beharko dute, beren plan estrategikoak definitzeko eta 2013-2016 aldirako dagozkien kudeaketa planak lantzeko.