Maiatzaren 22an, instituzio hurbilenetan garatuko diren politiken norabidea erabakiko da: herri bakoitzeko etxe bakoitzeko sukalde bakoitzean izango du eragina bozketak. Hauteskunde kanpainako kinielak albo batera utzi eta bost gai giltzarritan jokoan dagoena aurkituko duzu hemen: hondakinen kudeaketa Gipuzkoan, euskararen plana Araban, lurralde garapena Urdaibain, udalen zorpetzeko eskubidea Nafarroan eta aurrezki kutxen etorkizuna Hego Euskal Herrian.
Udal eta foru hauteskundeetan Hego Euskal Herriko 2.192.186 lagun daude botoa ematera deiturik. Lau herrialdeetako 523 udaletako 4.595 zinegotzi aukeratuko dira. Halaber, Araba, Gipuzkoa eta Bizkaiko Batzar Nagusietako 51na batzarkide eta Nafarroako Legebiltzarreko 50 parlamentari ere aukeratuko dira. Hori bakarrik? Ez. Hori baino askoz gehiago dago jokoan. Emaitza elektoralak erabat baldintzatu dezake mankomunitate, sozietate publiko, kuadrilla, patronatu, finantza entitate eta bestelako organismoetako administrazioa; milaka milioi euro kudeatzen dituzten erakundeak dira.
Pleno politikoetan eta administrazio kontseiluetan egosiko dira herritarrentzat garrantzia itzela duten gaiak: azpiegiturak, energia, kultur politika, finantzaketa, plan estrategikoak... Segidako bost artikuluekin irakurleak tamaina hartuko dio bere botoarekin erabakiko duenari.
M-22ko hauteskundeen inguruko erreportajeak:
- Hondakinen kudeaketa Gipuzkoan. Zero zabor eredurantz ala errausketarantz?
- Arabako Foru Aldundiaren Euskara Saila. Plan Estrategikoak ez du aurkaririk
- Urdaibaiko gudua. Zelan eutsi sukar eraikitzaileari Biosferaren Erreserba batean
- Udalen zorpetzea Nafarroan. Foruaren gorringoa zuritu nahian
- Aurrezki kutxen etorkizuna. Kutxen geroa hauteskundeen ondoren