Aste honetan, martxoaren 3an, Espainiako Poliziak Gasteizko San Frantzisko parrokian langileen batzarraren kontra egindakoan eragindako masakrearen 35. urteurrena da. Fraga Iribarne eta Martin Villak gidatu zuten politikoki gertaera hura. Bost langile hil ziren eta hainbat zauritu. Hogeita hamabost urte geroago, ardura penalek eta politikoek depuratu gabe segitzen dute eta ministro frankista izandako Fragak politikan jarraitzen du, PPren presidente eta senadore. Irlandako Derryn ere, antzeko zerbait pasa zen 1972ko urtarrilaren 30ean: hamalau herritar ejertzito britainiarraren balek jota erori ziren. Unibertsalki Bloody Sunday (Igande Odoltsua) moduan ezagutzen duguna izan zen.
Urteurren honetan, Martxoaren 3ko Biktimen Elkarteak bultzatuta, jardunaldi bateratua antolatu dute (Gasteiz 76 – Derry 72), Espainiako eta Britainia Handiko indar armatuen basakeriak sortutako biktimak errekonozitzeko. Irlandako delegazio bat Gasteizen izango da. Egia, ordaina eta justizia lortzeko, biktimek egiten duten esfortzua errekonozitu nahi da, bai eta Irlanda eta Euskal Herriaren arteko elkartasuna azaldu ere. Horregatik, Irlandako adibideak Gasteizko aurtengo ekitaldiak markatuko ditu: eskubide zibil eta politikoak aldarrikatuko dituzte, eta baita biktimek gatazken konponketan duten papera ere. Egiaren Batzorde bat eskatzen dute, “genozida kriminalak” epaitzea ahalbidetu eta Estatuko segurtasun indarrak erabiliz azken hamarkadatan egon den isiltasun eta zigorgabetasunarekin amaituko duena. Francoren gobernuko Fraga Iribarne eta Martin Villa oraindik bizirik egonik, gutxienez euren ardura onartzeko ordua da.