Davoseko Munduko Ekonomia Foroa amaitu da. Han bildu dira bankari, enpresari eta multinazional handiak, bai eta politiko garrantzitsuak ere. Elurrak isolaturik eta polizia lerro izugarriak babestuta, gaur egungo egoera ekonomikoa aztertu eta “despistaturik” dabiltzanei abisua eman zien. Bi ondorio atera litezke boteretsuen klub horretatik. Bat, ekonomiak menderatzen duela politika. Bankariak, multinazionalak eta enpresari handiak dira politikoak menderatzen dituztenak: Sarkozy, Merkel eta beste hainbat. Eta bi, inoizko krisi ekonomiko finantzario handiena eragiteagatik beraien aurpegia ezkutatu behar luketenek –merkatuak, bankak eta inbertitzaile handiek–, horiexek dira paparra harrotuz klase politikoa menderatzen jarraitu nahi dutenak, euren balantze eta poltsikoen onurarako.
    

Sarkozyk eta Merkelek, lotsaz, finantza sektorearen nolabaiteko erregulazioa proposatu dute, eta horren aurrean banka –BBVA eta Santander horien artean– ofentsibara pasa da. Ez dago erregulaziorik. Europako eta Ipar Amerikako gobernuek egin behar dutena da –esan du bankak– zor subiranoaren arazoak konpondu, “Europarentzat arrisku potentzial handiena, baina ez bakarrik Europarentzat, baita mundu osoarentzat ere”. Lotsagabea izan behar da: diru publikoarekin historian izan den erreskate eskuzabalena jaso duen banka, zer eta, berak sortu duen zorraren arazoetara arreta desbideratzen saiatu da. Sektore finantzarioaren erregulartasun ezaren ondorio izan dira “kasinoko” kultura, zabor hipotekak, espekulazioa... Horiek eragin dute planetako krisirik handiena. Gobernuak, kikilduta, eraso horren mende jarri dira beste behin. Horregatik ez dira ausartzen finantza eragiketei tasa bat jartzera eta banka eta fortuna handientzako zerga berezia sortzera. Amore eman dute, aldiz, inposatzen zaizkien erreforma antisozialen aurrean. Bankak menderatzen jarraitzen du!