Topatu zuena Gaztelako Getafen Realak. Paraje horietan euskal taldeak piper-potoz errezibitzen dituzte. Ohikoa dute, ez da probokazioa indar erakustea baino. Berdez jantzirik zeuden gureak, elastikoaren ezker besartean ikurrina zeramaten. Selekzioa zirudien. Antoinek (gure lagun salamankar batek Antxonito esaten dio) bigarren gola egin zuen eta elurrik eta kotxerik ez zegoenez, ikurrina musukatuz ospatu zuen bere jokaldia. Probokazioa. Horrela hartu zuen bertako zalegoak eta inork entzun nahi izaten ez dituenak orroka jaurti zizkioten.
Taldekide batek baino gehiagok aurpegiratu zion momentuan, Lasarteren keinuek ere, Antoinen ospakizunak deserosotu egin zituela adierazten zuten. Partiduaren ondoren, publikoki damutu zen jokalari frantsesa. Nago, palkutik etorri zitzaiola gomendioa golen ospakizunak inprobisatzen ez duenari. Aldagelako zenbaiti esker oneko mezua igorri nahi ziela iruditzen zait, bikain tratatu dienei seguru aski. Ez zen tronpatu, hori nahi zuen egin. Antoinek ikasi du beste lezio bat oraingoan: gorrotatzen gaituzte Espainian, mendeko nahi gaituzte, bestelakotuak. Eta inguruan, ikurrina bai baina babesle profesionaltzat, peajetzat nahi dute alegia. Espainolak ditugu.