Irakurle, datozen urteetan, hemen irakurtzen dituzunak zure inguruan nolabait islatuak ikusten ez badituzu, gaizki ibiliko garen seinale. Hedabideetan jardun beharko da bizikidetzaz, plazan, eskolan, tabernan, etxeko otorduetan… Euskal herritarrok elkarbizitzarako gutxieneko batzuetan ados jarri garela, berradiskidetzea abian dela, ez dela berriz hilko autodeterminazioagatik, ez dela berriz torturatuko informazio bila edo izua barreiatzeagatik. Biktima eta sufrimendu guztiak, enpatia, memoria kritikoa, begirada prebentiboa… Horiek guztiak eta askoz gehiago entzun, jaso eta barneratu beharko ditugu egun bizi dugun bake prozesuak bide egiten badu. Larrun honetan ez dira ikuspegi guztiak, baina bai elkarbizitza berriaren gako nagusiak.
Espetxe batera joz heldu diogu lehenik elkarbizitza eta bizikidetzaren gaiari, eta Langraizko espetxean diren zazpi presorekin egindako elkarrizketa kolektiboa ekarri dugu LARRUN gehigarrira.
Hiru iritzi artikulu ere bildu ditugu: Jonan Fernandez, Sabino Ormazabal eta Kieran McEvoy. Lehenengo biak gatazkaren lurraldetik ari dira, Euskal Herritik. Hirugarrena irlandarra da eta munduko hainbat berradiskidetze prozesu gertutik ezagutzen ditu: Ipar Irlandan eta munduan jazotako esperientzien berri luzatuko digu.