I Gabon inguru hontan inor ez da xurra krisian gaudela ta guzia gezurra! Kontsumismoak egin digu iruzurra: patrikak hustu eta gorputza izurra. |
II Lehen Erregeak ziren orain Olentzero denak batuta ere azkenean zero mezu berberarekin baitatoz urtero: Guztiok egitea dendaren bezero. |
||
III Jaitsiko balitz Jesus gurutziltzatua lehenbizi salatuko luke Aita Santua ta gero kontsumismo neurriz pasatua esanaz “hori ez da nik proposatua”. |
IV Jesusen historia konta izan denez mundu berri batean egin zuen amets. Izan nahi zuen hura behartsuen babes bihurtu da dirua lortzeko lanabes. |
||
V Belengo estalpea, Belengo arotza gaur egun askorentzat histori arrotza. Gabon kanpaiak txin txin diruaren hotsa horrela ospatzen da Belengo jaiotza. |
VI Iberdrola ere txintxo Belenaren bila piztu ditu milioika farol ta bonbilla ta orain eskertzeko halako lan pila tarifa igo eta lasaitu dadila. |
||
VII Nahiz eta jakin zer den saltzaileen asmua, Olentzeroz mozorro oi dute mamua. Beti bezala irents dugunez amua alferrikakoa da oraingo damua. |
VIII Nahiz askok ez sinistu Belengo estanpan urtero izar bera pizten dute mapan. Nola denok erori ohi garenez tranpan orain arnas estuka urteko aldapan. |