Oroiminari jarriak
Dani Blanco
| I Azaroa zeren hazi? Goitik dena dator gazi hauxe falta zen, memoriari oroitzea galeraz |
II Alzheimerraren eztena justu kontrako eskema: Oroiminaren hasiera da gogoratu nahi ez dena |
|
| III Ukatuak, omenduak bizia emanak, kenduak... Zauria ireki egin behar du aitortzaren ukenduak |
IV X jauna iraganaz kezkaz eta tripak janaz... Damu zalantzez hizketan, damu gehiago hil ez izanaz |
|
| V Azaroaren hamarra denboralearen garra berea eske itsasoa ta memoriaren indarra. |
VI Memoriaren Egunean neu ere begirunean. Ahaztu gabe oroitzekoak justu biharamunean. |
|
| VII Alde bakarreko grinak begi bakarreko minak igual arrazoi izango dute denak ez dira berdinak. |
VIII Joseba Arregi zena tortura oihu ozena gero Meliton ta konpainiak dute biktima izena. |
|
| IX Ehunka, ez bost ta ez zazpi hotzikararen argazki Durangon ere ikusiko da “Gernika ez zutela aski”. |
X Zenbat gorpu ta arima behar ditugunak mima baina lehenbizi argituta zein, noren ta zeren biktima. |
Doinua: “Oihaneko pagoak blai”.
Bidali zure sortak bertsoak@argia.eus helbidera. Aukeratuak orri honetan argitaratuko ditugu.