Ginen helmugaren bila ustezko bide zuzenetik. Oinez. Lanabes arinez bidea irekitzen eman ditugu gure urte sasoikoenak. Gure bide zidorretatik landa, kubotaz eta garabi erraldoiez autobideak plantatu dizkigute zirkuitu itxiak egituratuz. Eskotean erositako beren auto azkarrez itzuli-mitzulika dabiltza harro asko gu alboratzeko zereginetan asmatu ezinik eredugarri. Restop lasaigarriz bete dute zirkuitua euren apeten hornitzaile. Bapo dabiltza haurrak manexetan nola. Autonomia Estatutua deitzen diote guneari. Urtero antolatzen dute jai publiko bat, egunero pribatua dena. Albotik begiratzen jarraitzen dugu orube bilakatu dizkiguten lurrak, eskuz eraikitako etxoletako biztanle behartuak.
Ez gaude ezinduak, nahiz eta nire lagunmin batek esaten zidan bezala, lagun andana hiltzen ari zaigun ondorengoak preso utzita, zirkuitukoek eurearen mantenu lanek hala aginduta. Aitzurrek, palek eta karretilek estalperik gabeko eremuan herdoila bildu eta txatarrerako egin dute. Lanabes berrien beharretan gaude, gure bidean goiti egin nahi badugu. Eta orain arte bezala, zirkuitukoak atzetik izango ditugu eraikitzaileak bailiran beren kubotak eta garabi erraldoiez gurea edertzen berena bailitzan. Ez dio axola, bideak du garrantzia.