Garabide elkarteak plazaratu du Euskararen berreskuratzea. Hizkuntzak biziberritzeko gako batzuk izeneko liburua. Euskaldunen komunitateak ezohiko ezaugarriak dituela kontuan harturik –hizkuntza zaharra, baina aldi berean modernizatua izatea, kasu–, hizkuntza biziberritzeko lanean bildutako esperientzia partekatzea du helburu saio labur honek. Liburuan parte hartu dutenek uste dute euskara berpizteko egindako lana baliagarri izan daitekeela mundu osoko beste hizkuntza gutxituentzat ere. Ez da txikia afera: mende honetan hizkuntza asko desagertuko direla aurreikusten dute adituek, eta hori gelditzeko beharrezkoa izango da esperientziak partekatzea.