Joan Miró (Bartzelona, 1893-Palma, 1983) artistaren 140 lan jarri dituzte Donostiako Kursaaleko Kubo-Kutxa aretoan. Miró. Poesia eta argia erakusketa urriaren 12ra arte egongo da zabalik. Lan gehienak Mirók hil aurreko azken urteetan egin zituen, 1956 eta 1983 artean. Mallorcan (Herrialde Katalanak) eman zituen azken urteak.
Jose Luis Rebordinos izango da Donostiako Zinemaldiko zuzendari berria, datorren ediziotik aurrera. Mikel Olaziregik arrazoi pertsonalek bultzatuta utziko du kargua aurten. Rebordinos Donostiako Fantasiazko eta Beldurrezko Zinema Astearen zuzendaria da egun.
Euskadiko Filmategiak 2.000 bobina jaso zituen 2009an dohaintzan, aurreko urtean baino bi bider gehiago. 6.245.329 metro pelikula ditu guztira. Jasotako bobinen erdia herritarrek emandakoak dira. Mikel Arregi zuzendariak herritarrak animatu zituen Filmotekan beren grabazioak uzteko.