Eraikuntzari jarriak

I Eraikuntza den mundu ilun honetara, batzuk oharkabean ailegatu gara. Euroa onartzean Jaungoiko gisara, bere premisa dator guztion baitara: zer erosirik dela zer saldurik bada.	II Hamaika arkitekto, aparejadore, ingeniari mota eta promotore dotrina aplikatzen dabiltza dotore: ahal den gutxien eman, ahal den dena gorde. Eta norberarentzat baldin bada hobe…	III Lursail huts erdi ahaztu bat izan zena lehen negozioa denez eraiki ondoren, hara eraikuntzaren tranpa non dagoen: guztiek irabazten dutenez nabarmen, begi-bistakoa da zeinek galtzen duen…
IV Nahiz beti ez dabilen hitzetik hortzera, agintariek duten ardura hortxe da. Kulparik ez dutenek ohi duten antzera, lehen harria ez dute botatzen, bai zera! Obraro baitoaz lehen harria jartzera.	V Polikiroldegiak, museo gehienak, errepideak, tunel argiztatuenak, etxebizitzak eta gainontzeko denak, zer dira, gizarteak behar dituenak edo behartutako gizartearenak?	VI Bizi izandakoen oroitza bizirik manten dadin, bihotzak sorta idatzi dit. Eta nik behintzat ez dut zalantza izpirik: gure mundu honetan, zer den ikusirik, kontzientziak ez du kabida handirik.

Doinua: Hamalau heriotzena

Bidali zure sortak bertsoak@argia.eus helbidera. Aukeratuak orri honetan argitaratuko ditugu.