Jon Anzaren desagerpena salatu zen lehen egunetan, gertaera gerra zikinari egotzi zitzaion euskal gizarteko esparru zabaletan. Historiaren itzalak ematen zuen halakorik irudikatzeko. Bere agerpenaren albisteak eta kasuaz emandako azalpenak, bertsio ofizialen putzu sakon eta ilunera garamatza. Gertaerak eta zalantzak argitzera baino, gerra zikinaren itzala indartzera datorrela dirudi. Bai, arrazoia eta egiaren izenean, zantzu eta susmo txarrak frogatu arte ezin dela hipotesirik baztertu eta akusazioekin tentuz ibili behar dela, baina....

Ilunguneak hain indartsuak dira eta  emandako argiak hain ahulak! Bertsio ofizialak “akats burokratikoekin”  bete ditu hutsune handienetakoak, eta, hala ere, Baionako Anne Kayanakis prokuradoreak argitu beharreko ugari dagoela aitortu du. Hara zalantzetako ugariak:

- Anza maiatzaren 11n hil zenean Tolosako Rangueil ospitalean zergatik ez zitzaion horren berri eman poliziari, identifikatu gabeko bat hiltzean legeak agintzen duen moduan?

- Gero hiri bereko Purpan ospitaleko gorputegira eraman zutenean ere ez zitzaion berri eman poliziari? Bigarrengoz akats burokratikoa?

- Eta ekainaren 4an Purpan-eko zuzendariak han ez zela identifikazio gabekorik adierazi zion prokuradoreari.

- Bat-batean, duela egun gutxi batzuk Liberation irakurtzen ari den gorputegiko langileak Anzaren ezaugarriak lituzkeen pertsona Purpanen dagoela jakinarazten dio bere lagun poliziari eta honek pizten du alarma.
Noiz eta gorputegian 10 hilabete daramanean.

- Gorpua 2009ko apirilaren 29an Tolosako kaleetan topatu zutenean, 500 euro zituela zioen gertaeren aktak, baina ez Baiona-Tolosa joan-etorriko txartelak ere bazituela. Pista klabea, ia urtebete gorputegian, baina hau ere oharkabean.

- Eta ilungunerik handiena: zer gertatu zen Baionatik atera zen 18tik eta Tolosan topatu zuteneko 28ra arte?

- Nola jakin izan da 300.000 euro zeramala ETArentzat, honek bere agirian halakorik adierazi ez bazuen? Bide batez, Alfredo Perez Rubalcaba Espainiako barne ministroak iradokitako hipotesia baztertu da, hau da, Anzak diruarekin ihes egin izana.

- Espainiako Segurtasun indarrek bazekiten Anza etakidea zela, 2008ko azaroan Senperen aurkitutako ETAren zulo batean bere hatz-markak topatu baitzituzten.

- Joan den astelehenean jakinarazi zuen El Mundok, Antonio Rubio kazetariaren eskutik, Anzaren familiak bere desagerpenaren salaketa jarri zuen egun berean guardia zibil talde batek arrapaladan egin zuela alde Tolosako Adagio apartahoteletik, eta gela bateko ohearen koltxoipean bi pistola ahaztu zituztela.

Zalantza eta ilun-gune gehiegi eta halakoetan susmoek euren bidea egiten dute. Aurrekarien indarra ere ez da txantxetakoa: Joxe Arregi, Lasa-Zabala, Mikel Zabalza, Xabier Kalparsoro Anuk, Jose Luis Geresta, Josu Zabala Basajaun, Eduardo Moreno Bergaretxe Pertur, Popo Larre, Jose Miguel Etxeberria Naparra... “Arazo burokratikoetatik” harago Frantziako justiziak badu lana.