Duela zenbait hamarkadatik BIEMH Espainiako Makina Erremintaren Biurtekoa Bilbon burutzen da. Eta 2010 honetan biurteko horren 26. edizioa egingo da. AFM Makina Erreminta Fabrikatzaileen Elkartea, BECekin batera antolatzen ari da eta maiatzaren 31tik ekainaren 5era burutuko da Barakaldoko azoka-eremuan. Sektore honetako Europako hirugarren azoka garrantzitsuena izaki, biurteko honek mundu osoko dozenaka milaka bisitari eta 2.000 erakustoki inguru bilduko ditu. 2008an burutu zen azken edizioan, biurtekoak BECeko 57.322 metro koadro hartu zituen, 1.761 erakustoki bildu ziren eta munduko 42.000 profesional ingururen bisita jaso zuen.

Aurtengoan ere munduko fabrikatzaile eta banatzaile nagusiak bilduko dira, bisitariek espezialitatean lider diren enpresen azken berrikuntzen eta zerbitzuen berri jaso ahal izan dezaten. Noski, euskal ordezkaritza nagusietakoa izango da, sektore honek Euskal Herrian (100 enpresa eta 5.000 enplegu) eta Europan duen garrantzia dela eta. 2010eko biurtekoak Euskal Herrian eta munduan hain garrantzitsua den sektore hau 2011tik aurrera errekuperatzeko lorbidea zabalduko du.

“Biurteko beltza” betetzen ari da

Testuinguru sozioekonomikoa ez da egokiena industria sektorean, baina 2011tik aurrera aukera hobeak aurreikusten dira. Argi dago CECIMO metalak lantzeko Europako Makina Erreminta Ekoizleen Elkarteak egin zituen aurreikuspenak betetzen ari direla, astekari honek iaz nabarmendu bezala. CECIMOk makina-erremintaren sektoreko Europako sei estatu garrantzitsuenak biltzen ditu: Alemania, Italia, Suitza, Erresuma Batua, Frantzia eta Espainia.

CECIMOk 2009-2010 sektorearentzako “biurteko beltza” izango zela ohartarazi zuen, bai ekoizpenean, bai kanpo merkataritzan. Hala, 2008an Europan sektoreak lortutako emaitza onen ostean 2009ko eta 2010eko eboluzio negatiboa iragarri zuten. 2008an makina-erremintaren sektoreak jarrera oso positiboa izan zuen Europan eta %8 hazi zen. Baina 2009an eta 2010ean aldagai guztiek behera egin dute. 2008an 21.382 milioi euro ekoitzi ziren eta 2010ean, aldiz, 18.159 milioi aurreikusten da, hau da, ekoizpena %15,1 jaistea. Halaber, erakunde horrek 2011n Europako ekoizpena %8,4 haziko dela aurreikusi zuen, 19.763 milioi eurotara iritsi arte. Esportazioei nahiz barne kontsumoari dagokienez, CECIMOk %12ko jaitsiera aurreikusi zuen 2010ean: 14.060 milioi eurotik 11.058 milioira. Amaitu berri den 2009ko datuen arabera, oraindik ofizialki eskura ez izan arren, aurreikuspenak beteko direla dirudi. Baita 2010ekoak ere, joera positiboagoa izan daitekeen arren.

Lehen seihilekoa txarra, bigarrena txarragoa

2009ko lehen seihilekoko datuak dagoeneko eskura daude eta, horien arabera, urteko lehen erdia kaxkarra izan zen sektorean eta, zantzu guztien arabera, bigarren erdia okerragoa. Hauxe da 2009ko lehen seihilekoari buruz analistek duten iritzi orokorra: esportazioek urteko lehen sei hilabeteak salbatu zituzten, 2009aren hasieran espero baino gehiago; inportazioek, aldiz, deskalabru izugarria izan zuten.

Horrenbestez, AFMren beraren arabera, 2009ko lehen seihilekoan, esportazioak 295 milioi eurokoak izan ziren eta horrek esan nahi du %10,5 egin zutela behera aurreko urteko aldi berarekin alderatuz gero. Jaitsi arren, zenbait adituk datuak positibotzat jo ditu seihileko horren krisialdi testuingurua kontuan hartuta. Datuak taulan dituzu. Inportazioak, bestalde, oso nabarmen murriztu ziren: 107,6 milioi euro, 2008ko aldi berarekin alderatuta %58 gutxiago.

Ondorioz, 2009ko lehen seihileko salerosketa 402,6 milioikoa izan zen guztira. Horrek esan nahi du 2008ko lehen seihilekoan baino %31,8 gutxiago saldu eta erosi zela. Azkenik, 2009ko bigarren seihilekoaren datu ofizialak oraindik jakinarazi ez badira ere, lehen seihilekoa baino okerragoa izan zela dirudi.