Corto Cuentos
Borja Crespo / Chema García
Astiberri - 2009
128 orrialde, koloretan. 17 euro
http://corto-cuentos.blogspot.com

Getxoko Komiki eta Manga Azokan erosi zuen nire lagunak Corto Cuentos liburua, Astiberri argitaletxearen estandean. Komikiak atsegin ditu, baina ez da ohiko irakurlea. Gehiago gustatzen zaizkio argazki, koadro eta marrazki koloretsuak. Horregatik erosi zuen Corto Cuentos, Chema Garciaren irudiek erakarri zutelako.

Arrazoi eman nion, ilustrazioak ederrak dira, batzuetan xalo baina oro har ederrak. Sentsazioa dut, ordea, edertasun horrek harreman handiagoa duela estilo aniztasunarekin, irudien kalitate grafikoarekin baino. Garciak estilo ugari erabili ditu; marrazkiak artista desberdinek egin dituztela dirudi, eta irakurleak atseginez hartzen ditu ezuste estetiko horiek, irakurle mota batek bederen.
Komikizale bezala, liburuak apur bat deskolokatu nau: Ez dakit zein publikori zuzenduta dagoen. Umeei? Helduei? Borja Cresporen ipuin batzuek hausnarketarako bide ematen dute, baina beste zenbait istorio motz antzean geratzen dira, lotarako orduan seme-alaba txikiei kontatzeko ipuinak balira bezala. Bakarren batek esango du istorio horiek ere bigarren irakurketa bat dutela, poesia direla. Ez dakit zer esan.

Gainera, lauzpabost esaldiko ipuinetan, marrazkiek protagonismo handia hartzen dute. Izugarri ilustrazio politak balira, tira, baina kasu honetan... Aizu, duela gutxi irudiak ederrak direla esan duzu, ezta? Bai, egia da, liburuan badaude koadro politak, begien gozagarri izan daitezkeenak, baina osotasunean... oso ongi nola definitu ez dakidan zerbait falta da.

Hori bai, Chema Garciaren marrazkiek txukun bat egiten dute Borja Cresporen istorio laburrekin, “bat egin” baino, zenbaitetan “jan egin” zuzenagoa litzatekeen arren. Dioguna, baleko komikia da –estetikoki behintzat–, baina nortasun sendoagoa emango lioketen elementuak falta zaizkio, irakurlea galdurik ez sentitzeko bereziki.