Aspaldian nobelarik argitaratu gabea zen Luis Haranburu Altuna. Oker ez bagaude, 2002an Hiriarekin argitara eman zuen Kandido, edo Euskadi independientearen ukronia (2002) zen alor horretan idazle emankor honek utzitako azken emaitza. Argitaletxe beraren eskutik datorkigu Ardo zopak izeneko nobela hau ere. Kapitulu laburren bidez kontatu du istorioa Haranburu Altunak: 1953-54 urteak dira eleberriaren ardatza. Urte haietan sei-zazpi urte zituen idazleak, eta txikitako oroitzapenak baliatu ditu kutsu autobiografikoko kontakizuna harilkatzeko.