Nafarroako Antzerki Eskolako ikasleek eta antzerki munduko langileek kezka azaldu dute zentroaren etorkizuna dela-eta. Nafarroako Gobernuak 2010erako prestatu dituen aurrekontuetan, NAEri diru-laguntza erdira jaistea aurreikusi du eta hori hala bada, egoera jasanezina izango dela eta zentroak bizirik jarraitzea zaila izango dela esan dute.
BataKlon ahari gaztearen abenturei segida ematen dien liburua plazaratu du Alberdaniak, BataKlon Ilargialden. Sylvet Carok idatzi du liburua eta ilustrazioak Marko Armspachek egin ditu. Euskarazko itzulpena berriz Kattalin Totorikarena da. Txalapartak, bestalde, Marizipriztinek ez du zorioneko galeperrik nahi plazaratu du, Marizipriztin ipuin klasikoaren bertsioa. Neskatila aske agertzen da, bere erabakien jabe; ez du printze urdinari lotzeko eta takoietan ibiltzeko asmorik. Nunila Lopez eta Myriam Camerosen liburua Itziar de Blasek eta Mikel Garmendiak euskaratu dute.