Vice Presidentes talde gasteiztarrak EP berria argitaratu du. Bloodola du izena taldeak bakarka argitaratu duen bigarren lanak –iaz Sorkunekin batera disko bat grabatu zuten–. Binilo formatuan kaleratu dute: sei abesti, hamar minutu; esan beharrik ez dago azkar jotzen dutela. Mike Olfielden Tubular Bells abestiaren moldaketa da diskoko bitxikerietako bat –Jugular Bells du izena bertsioak–. Guztira Bloodolaren 525 ale kaleratu dituzte. Dena dela, diskoa doan deskargatzeko aukera dago Interneten: www.myspace.com/vicepresidentes.
Luna Krearen bigarren edizioa prestatu dute Gasteizen, irailaren 11rako. 50 obra artistiko izango dira ikusgai. Aurtengo berrikuntzarik nagusiena bideoklip maratoia izango da. Bertako eta atzerriko 40 bideoklip inguru aurkeztuko dira jendaurrean eta horietatik hamabost hautatuko dituzte Gasteizko Foru plazan erakusteko. Dantza ikuskizunek, musikak, arte plastikoko erakusketek eta antzerkiak Luna Krearen programa mamituko dute.
Fasio, Bonifazio Arandia (1909-1987) zena omenduko du Igorreko Udalak hilabetez. Abuztuaren 30ean hasi ziren soinujolearen omenezko ekitaldiak, haren jaiotzaren mendeurrenarekin bat eginez. Irailaren 24an jarraituko du omenaldiak, Fasio eta XX. mendeko trikitiari buruzko mahai-inguruarekin. Irailaren 25ean erromeria izango da eta 26an kontzertua. Erakusketa bat ere antolatuko dute Igorren.