Elkar argitaletxeak Ateko bandan sailean berrargitaratu du Gotzon Garateren New York, New York liburua, egilea zendu eta urtebetera. 1988an publikatutako liburuaren edizio zuzendua duzu honakoa, Ainhoa Lendinez Garatek, egilearen ilobak egin baitu testuetako euskararen gaurkotzea. Gainera, Juanra Madariagaren hitzaurrearekin jantzirik aurkeztu dute. Garateren obrarentzat zenbait berrikuntza ekarri zituen liburu honek: batetik, kronikaren generoa landu zuelako, eta, bestetik, euskalki guztietako ekarria bereganatzeko ahalegina izan zelako. Liburua idatzi aitzin, Garatek hemezortzi uda pasa zituen New Yorken, eta zuzenean ezagututako gertakariak dira liburuan kontatzen.