Baionako Euskal Museoa. Eguna: Martxoaren 1a. Bertsolariak: Maialen Lujanbio eta Amets Arzallus.

Bestela ez garela joaten, eta bertso-hotsari jarraiki sartu gara Baionako Euskal Museoan. Bestela bertsorik entzungo ez luketenak, museoaren ikusmirak ekarri ditu bertsolarien aurrera. Bi publikoak batu ditu museoaren animazio ekintza honek. Xan Iriart Museoaren komunikazio arduraduna asebete du horrek: “Bertsolarien eta museoaren publikoak gurutzatzea gauza ederra da. Gainera, beti ari gara turistak nola erakarriko, baina Euskal Museoa gurea da, eta egun bertako jende asko ez da etortzen”.

Euskaraz eta frantsesez gidatu gaituzte gelaz gela, bertsolariei ikusgai dauden gaiak jarriz. Jokoa ematen dute arrotz zaizkigun objektuek, galdu ditugun lanbideek, oraindik indarrean diren tradizioek... eta bertsolariek jokaldi ederrak egin dituzte, iraganean geratu gabe, gaurkotasunezko gaiak atereaz. Publiko bertsozalea gustura geratzeko modukoa izan da.
Museoetako azalpen gehiago lasai emateko gomendioa luzatzen diegu hemendik. Xehetasun eta datu gehiago beldurrik gabe emateko aurkezpenetan.

Museoak, etxeak berak, hunkitu gaitu. Patio biribilaren erditik bota dute agurra bertsolariek, eta publikoak lehen pisuko barandillatik entzun ditu, kupulapeko argitan. Sonorizazio bete betean. Arrantzaren solairuan, kantoi estu bat bada, eta bertan, bankuan eserita egonaldia egin du amona batek... Bertsotrama berezi bat egiteko lekua da museo hau, bertsolariak eszenaz eszena mugitu eta entzuleek nahi duten lekutik istorioa jarraitzekoa...

Horrelako gehiago egin behar dituztela ondorioztatu du Iriartek. Hurrengo zita ekainaren 7an da, arratsaldeko 16:00etan. Bigarrenez museora sartzeko modukoa.