Txirri, Mirri eta Txiribiton pailazoek Petiri Danbolin diskoa (Elkar) argitaratu dute. Euskal Telebistan saioak eskaintzen hasi zirenetik 25 urte joan direla ospatu dute pailazoek disko berriarekin, eta pailazo izateaz gain txistulari ere izan direnez, disko honetan garrantzi berezia eman diote musika tresna horri.
Katixa Agirre idazle gasteiztarrak Habitat ipuin-liburua (Elkar) plazaratu du, Igartza bekaren laguntzari esker. Etxea ardatz duten sei istorio bildu ditu liburu berrian. Pertsonaiek hain goxoa ez den bakardadea pairatuko dute, hain zintzoak ez diren maitasun istorioak biziko dituzte, mudantza etsigarriak eta bisita deserosoak agoantatu beharko dituzte, eta batzuek, dena galduko dute etxeak ordezkatzen duen ustezko independentzia horren peskizan.
Aitor Arana legazpiarrak euskarazko narratiba alorreko Irun Hiria saria jaso du, Oscar eta Sebastian eleberriari esker; eta Luis Garde iruindarrak euskarazko poesia alorrekoa, Unplugged liburuagatik. Aranak 25.000 euroko saria eskuratu du, eta 15.000 eurokoa Gardek. Gaztelaniaz, Luis del Romero Sanchez-Cutillasen Manjar Blanco nobela eta Rafael Martinez Cuadradoren El polvo y la ceniza poesia-liburua saritu dituzte. 25.000 eta 15.000 euro irabazi dituzte, hurrenez hurren.